Ադրբեջանի հետ ընթանում են բանակցություններ խաղաղության համաձայնագրի ստորագրման շուրջ. ԱԽ քարտուղար
2 րոպեի ընթերցում
Հայաստանի և Ադրբեջանի միջև խաղաղության պայմանագրի տեքստը վերջնականապես համաձայնեցված է, ներկայում բանակցությունների հիմնական մասը վերաբերում է փաստաթղթի ստորագրման տեղի և ժամանակի որոշմանը։ «Արմենպրես»-ի հաղորդմամբ՝ այս մասին մայիսի 9-ին տեղի ունեցած ճեպազրույցում հայտարարել է ՀՀ անվտանգության խորհրդի քարտուղար Արմեն Գրիգորյանը։
Անդրադառնալով Ռուսաստանի միջնորդության առաջարկին՝ Գրիգորյանը նշել է, որ Մոսկվան այդ դերն արդեն ունեցել է երկար ժամանակ, սակայն ներկայում բանակցությունները ընթանում են հիմնականում երկկողմ ձևաչափով։
«Ռուսաստանը միջնորդի դեր ունեցել է, երկար ժամանակ ունեցել է։ Այս պահին պարզապես բանակցությունները հիմնականում ընթանում են երկկողմ, և դրա մասին և Երևանն է խոսել, և Բաքուն»,– ասել է նա։
Լրագրողների հարցին, թե արդյոք այդ ձևաչափը բավարար արդյունավետ է և հնարավո՞ր է վերադարձ միջնորդավորված գործընթացին, Գրիգորյանը պատասխանել է, որ երկկողմ բանակցություններում արդեն իսկ կա արդյունավետություն, ինչի վկայությունն է տեքստի ամբողջական համաձայնեցումը։
Հարցին, թե Թուրքիայի ակտիվ ներգրավվածության պայմաններում արդյոք հնարավոր է դիտարկել Ռուսաստանի միջնորդությունն այս փուլում, Գրիգորյանը արձագանքել է․ «Իսկ Ռուսաստանը ո՞ւմ կողմից է լինելու։ Այդ հարցի պատասխանը երբ որ ունենաք, այդ հարցը կքննարկենք»։