3 րոպեի ընթերցում
Օրեր առաջ տեղացած կարկուտի հետևանքով գյուղացիների բերքին հասցված վնասները գնահատելու նպատակով ստեղծվել է մասնագիտական հանձնաժողով:
«Արմենպրես»-ի փոխանցմամբ՝ ԱԺ–կառավարություն հարցուպատասխանին այս մասին ասաց Էկոնոմիկայի նախարար Գևորգ Պապոյանը՝ անդրադառնալով «Քաղաքացիական պայմանագիր» խմբակցության պատգամավոր Լիլիթ Ստեփանյանի հարցին, թե արդյոք ստեղծվե՞լ է հանձնաժողով՝ գնահատելու վնասի չափը:
Պապոյանը հայտնեց, որ հանձնաժողովը ստեղծվել է, այն աշխատել է թե երեկ, թե այսօր:
Նախարարը ներկայացրեց այս պահի դրությամբ ստացված օպերատիվ տվյալները:
«Հիմնական վնասները 7–8 գյուղում են տեղի ունեցել: Բայց ընդհանուր առմամբ ավելի քան 2 տասնյակ գյուղերում ինչ–որ չափով վնաս եղել է:Պտղի մասով միջինացված մինչև 30 տոկոս վնասվածություն ունենք: Իսկ բանջարեղենի դեպքում՝ 50–60 տոկոս»,–ասաց Պապոյանը:
Նա նկատեց, որ վնասը եղել է ոչ միայն ուղիղ կարկուտից, ելակի դեպքում հիմնական վնասը եղել է կարկուտի և հորդառատ անձրևի հետևանքով ամբողջ տարածքում ջրի լցվելու պատճառով: Դրա հետևանքով վնասվել է բերքի մի զգալի մասը:
Նախարարի խոսքով՝ աշխատանքները կշարունակվեն, վերջնական գնահատականի արդյունքում միայն կկարողանան եզրակացնել, թե որտեղ ինչ է եղել:
«Առանձին գյուղերում վնասվածությունն ավելի շատ է եղել: 1–2 գյուղ ունենք, որտեղ հատկապես ավելի մեծ վնասներ կան»,–նշեց նա:
Պապոյանը վստահեցրեց, որ հակակարկտային կայաններն աշխատել են ողջ ծավալով և ողջ գիշերվա ընթացքում:
«Բնակիչների, մասնագետների, տարածքային կառավարման ներկայացուցիչների բնութագրմամբ՝ առանց այդ հակակարկտային կայանների աշխատանքի բազմապատիկ ավելի շատ վնաս կլիներ: Իրոք, շատ խոշոր կարկտաբեր ամպեր են եղել»,–ասաց նախարարը:
Անդրադառնալով նախատեսվող աջակցությանը՝ նախարարը նկատեց, որ մարդիկ պետք է բերքը վաճառեին ու վերցված վարկերը մարեին: «Անցյալ տարի բավականին արդյունավետ աշխատանք ենք ունեցել Կենտրոնական բանկի և առևտրային բանկերի հետ, կետ առ կետ աջակցությունները փորձել ենք կարգաբերել: Կնայենք, թե այս դեպքում ինչ կկարողանանք անել»,–նշեց Պապոյանը: