1 րոպեի ընթերցում
Հայաստան-Ադրբեջան սահմանի սահմանազատման և սահմանագծման գործընթացները շարունակվում են, և որևէ անհամաձայնություն այս պահին չկա։ «Արմենպրես»-ի հաղորդմամբ՝ այս մասին հայտարարեց Հայաստանի Ազգային ժողովի նախագահ Ալեն Սիմոնյանը։
«Սահմանազատման և սահմանագծման գործընթացը շարունակվում է։ Ներկայում քննարկվում են այն հատվածները, որոնցում հետագայում նախատեսվում է գործընթացի շարունակությունը։ Գոհունակությամբ կարող եմ նշել, որ այդ գործընթացը մենք հասցնելու ենք ավարտին և արդեն իսկ արձանագրել ենք, որ այն իրականացվելու է Վրաստանի սահմանից մինչև Իրանի սահման»,- «Արմենպրես»-ի փոխանցմամբ՝ նշեց ԱԺ նախագահը։
Լրագրողի այն հարցին, թե եթե արդեն որոշված է գործընթացի ուղղությունը, ինչո՞ւ հողի վրա աշխատանքներ դեռ չեն իրականացվում, Սիմոնյանը պատասխանեց, որ կտոր-կտոր տրամաբանությունն է քննարկվում։
«Այսինքն՝ հերթականությամբ, առանձին հատվածներով գնում ենք առաջ։ Այդ փուլերը զուտ տեխնիկական բնույթ ունեն։ Հանձնաժողովների ղեկավարների և անդամների միջև աշխատանքներն ընթանում են, քննարկումները շարունակվում են, և որևէ անհամաձայնություն չկա»,- եզրափակեց Սիմոնյանը։