390.33
4 րոպեի ընթերցում
Երևանի «Զվարթնոց» օդանավակայանի ենթակառուցվածքները կընդլայնվեն, ինչը կբերի համապատասխան ծառայությունների որակի բարձրացմանը. կոնցեսիոն կառավարչի՝ «Կորպորասիոն Ամերիկա» ընկերության կողմից առաջարկվել է մեծ ներդրումային ծրագիր:
«Արմենպրես»-ի հետ զրույցում այս մասին ասաց ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը՝ նշելով, որ ընդլայնման հետ կապված իրավական տիրույթում կան որոշակի հարցեր, որոնք այժմ քննարկման փուլում են:
«Հայաստանի կառավարությունը և կոնցեսիոն կառավարիչն ունեն ընդհանուր մոտեցումներ տարբեր հարցերի շուրջ, և հիմա աշխատում ենք իրավական մասի ձևակերպումների վրա, հենց աշխատանքներն ավարտվեն և այս մասով ունենանք շոշափելի արդյունքներ, դրանք հանրությանը հասանելի կլինեն»,- ասաց Սիմոնյանը:
Անդրադառնալով օդանավակայանում նոր տերմինալ կառուցելու թեմային՝ նախարարի տեղակալը նշեց, որ այդ հարցը ևս ընդգրկված է ներդրումային ծրագրում:
Իսկ մինչ այդ պատասխանատուներն ամփոփում են ՀՀ օդանավակայաններում ուղևորահոսքերի ցուցանիշները, որոնք 2024 թվականին, կարծես, գոհացուցիչ են եղել։
«Ճիշտ է 2023 թվականի համեմատ մի փոքր անկում կար մոտ 1,3 տոկոսով, բայց, ընդհանուր առմամբ, 2024-ին Հայաստանի օդանավակայնների կողմից սպասարկվել է 5,4 միլիոն ուղևոր, որը, եթե համեմատենք 2019 թվականի արդյունքների հետ, բավականին մեծ ցուցանիշ է: 2024 թվականին 5 նոր ավիաընկերություններ են մուտք գործել հայկական շուկա: Հուսով ենք, որ 2025 թվականին նույնպես նոր ավիաընկերություններ կլինեն, որոնք օդային տրանսպորտով ուղևորափոխադրումներ կիրականցնեն դեպի Հայաստան և հակառակ ուղղություններով»,- նշեց փոխնախարարը:
Միտումները դրական են, և Սիմոնյանը հույս ունի, որ ուղևորահոսքի աճի միտումը կշարունակվի:
Փոխնախարարը նշեց՝ այս պահին տարբեր ավիաընկերությունների հետ քննարկումներ են ընթանում մի շարք մեխանիզմների շուրջ՝ ուղղված ինչպես «Զվարթնոց», այնպես էլ Գյումրիի «Շիրակ» օդանավակայաններում ուղևորահոսքի աճի խթանմանը:
Ուղևորահոսքի աճին կնպաստի նաև Եվրամիության «սև ցուցակ»-ից Հայաստանի դուրս գալը։
Փոխնախարարը նշեց, որ համատեղ ջանքերով Հայաստանը վերացրել է Եվրամիության ավիացիոն անվտանգության գործակալության հայտնաբերած չորս տասնյակից ավելի թերությունները։
Եվրամիության «սև ցուցակ»-ից դուրս գալու հստակ ժամկետներ այս պահին նշել հնարավոր չէ։ Նախարարի տեղակալի խոսքով՝ գործընթացը երկկողմ է, Հայաստանը պահանջված ամբողջ տեղեկատվությունը տրամադրել է, այժմ սպասում են ԵՄ գործընկերների արձագանքին:
Երևանի «Զվարթնոց» օդանավակայանի կոնցեսիոն կառավարիչը «Կորպորասիոն Ամերիկա» ընկերությունն է, որը պատկանում է արգենտինահայ գործարար, Հայաստանի ազգային հերոս Էդուարդ Էռնեկյանին։ Ընկերությունը «Զվարթնոց» օդանավականի կոնցեսիոն կառավարումը իրականացնում է 2002 թվականից։