2 րոպեի ընթերցում
Ամերիկայի Միացյալ Նահանգների նախագահ Դոնալդ Թրամփը ներմուծումների 10 տոկոս մաքսատուրք է սահմանել նաև Հայաստանի վրա։
«Արմենպրես»-ի փոխանցմամբ՝ ԱՄՆ նախագահը Truth Social-ի իր էջում հրապարակել է մաքսատուրքերի ցանկում ընդգրկված երկրները, որոնց թվում է նաև Հայաստանը։
ԱՄՆ նախագահը հայտարարել է, որ բոլոր ներմուծումների վրա 10%-անոց համընդհանուր մաքսատուրքերը ԱՄՆ-ում ուժի մեջ կմտնեն ապրիլի 5-ից։
Թեմային անդրադարձել է ամերիկագետ Սուրեն Սարգսյանը՝ ներկայացնելով Թրամփի որոշման հնարավոր ազդեցությանը Հայաստանի տնտեսության վրա։
Ամերիկագետը նշել է, որ Թրամփը սահմանել է փոխադարձ մաքսատուրքեր (Reciprocal Tariffs), այսինքն մեխանիզմ, որի միջոցով ԱՄՆ-ն մոտավորապես նույն մակարդակի մաքսատուրքեր է սահմանում այն երկրների նկատմամբ, որոնք սահմանափակում են իրենց շուկան ամերիկյան ապրանքների համար։
«Սա, իհարկե, նշանակում է հայկական ապրանքների գների բարձրացում ԱՄՆ շուկայում, ինչը կազդի դրանց մրցունակության վրա։ Որոշ առանցքային ոլորտներ կարող են տուժել պահանջարկի նվազման պատճառով, մասնավորապես՝ ալյումինի, քարերի, թանկարժեք մետաղների, գյուղատնտեսական արտադրանքի և ալկոհոլի արտահանումը»,- «Ֆեյսբուք»-ի իր էջում գրել է նա։
Հայաստանն ԱՄՆ է արտահանում հիմնականում սպիրտ և սպիրտային ապրանքներ, գորգեր և հատակի տեքստիլ ծածկոցներ, ադամանդներ և այլ թանկարժեք և կիսաթանկարժեք քարեր ու մետաղներ, ալյումին: