Իսրայելը հայտարարել է, որ կշարունակի ՀԱՄԱՍ-ի վրա ռազմական ճնշումը՝ պատանդներին վերադարձնելու համար
1 րոպեի ընթերցում
Իսրայելի վարչապետ Բենիամին Նեթանյահուի ավագ խորհրդականը հայտարարել է, որ կշարունակեն հարվածներ հասցնել Գազայում ՀԱՄԱՍ-ի օբյեկտներին՝ պատանդների վերադարձն ապահովելու համար:
«Արմենպրես»-ի հաղորդմամբ՝ ինչպես փոխանցում է Ynet պորտալը, Նեթանյահուի արտաքին քաղաքականության հարցերով խորհրդական Օֆիր Ֆալկի խոսքով՝ ռազմական ճնշումը ստիպել է ՀԱՄԱՍ-ին ընդունել իր առաջին զինադադարը 2023 թվականի նոյեմբերին, որի ընթացքում մոտ 80 պատանդ է վերադարձվել։
Նա համոզմունք է հայտնել նաև, որ դա մնացած 59 պատանդների վերադարձը պարտադրելու ամենաապահով միջոցն է:
«Միակ պատճառը, որ նրանք վերադարձան բանակցային սեղանի շուրջ, ռազմական ճնշումն էր, և դա այն է, ինչ մենք հիմա անում ենք», - ասել է նա լրագրողներին:
Ավելի վաղ հայտնի է դարձել, որ Իսրայելը վերսկսել է իր օդային հարվածները և ցամաքային զորքեր տեղակայել ռազմական գոտու ողջ տարածքներում: