Պեկինը հայտարարել է Մոսկվայի և Թեհրանի հետ իրանական միջուկային հարցի շուրջ բանակցությունների մասին
1 րոպեի ընթերցում
Չինաստանի, Իրանի և Ռուսաստանի դիվանագետները մարտի 14-ին Պեկինում հանդիպում կանցկացնեն իրանական միջուկային հարցի շուրջ: «Արմենպրես»-ի փոխանցմամբ՝ այս մասին հայտնել է Չինաստանի արտաքին գործերի նախարարությունը:
«Հանդիպումը կանցկացվի Չինաստանի արտաքին գործերի փոխնախարար Մա Չժաոսյուի նախագահությամբ: Դրան կմասնակցեն Ռուսաստանի ԱԳ փոխնախարար Սերգեյ Ռյաբկովը և Իրանի ԱԳ փոխնախարար Քազեմ Ղարիբաբադին», - ասվում է հաղորդագրության մեջ։
Կողմերը կքննարկեն նաև ընդհանուր հետաքրքրություն ներկայացնող այլ հարցեր։
Ավելի վաղ Ռուսաստանի ԱԳ նախարար Սերգեյ Լավրովը հայտարարել էր, որ Մոսկվան կողմ է իրանական միջուկային ծրագրի շուրջ համաձայնագիրը սկզբնական տեսքով վերականգնելուն։
«Հանդես ենք գալիս սկզբնական ծրագրի վերականգնման օգտին, որից ամերիկացիները հրաժարվել են Դոնալդ Թրամփի առաջին նախագահության օրոք»,- ամերիկացի բլոգերներին տված հարցազրույցից Լավրովի խոսքերն է մեջբերում «Ինտերֆաքս»-ը։