Երևանի մի շարք փողոցներում լուսավորության արդիականացման և մայթերի բարեկարգման աշխատանքներ կիրականացվեն
2 րոպեի ընթերցում
Այս տարի Երևանի 6 փողոցներում լուսավորության արդիականացման աշխատանքներ կիրականացվեն:
«Արմենպրես»-ի հաղորդմամբ՝ այս մասին Երևանի քաղաքապետարանի գործակարգավարական նիստում հայտնեց «Երքաղլույս» ընկերության տնօրենի ժամանակավոր պաշտոնակատար Հայկ Մուրադյանը:
«Այդ փողոցներն են՝ Աբովյան, Տիգրան Մեծ, Մելիք Ադամյան,Նալբանդյան և Դեմիրճյան: Նախատեսվում է բոլոր մալուխներն անցկացնել ստորգետնյա ճանապարհով, որը մեր գրաֆիկով պետք է ավարտենք մինչև հոկտեմբեր: Բացի այդ, ունենք լեդավորման ընթացիկ աշխատանքներ, որոնք վերաբերում են Երևանի տարբեր փողոցների, այդ թվում՝ առաջիկայում պլանավորում ենք Արաբկիրում Ավետիսյան, Սարալանջ, Շենգավիթում՝ Արտաշիսյան, Արարատյան, Չեխով և Կենտրոնում Մոսկովյան փողոցների լուսավորության արդիականացման աշխատանքներ իրականացնել»,-մանրամասնեց Մուրադյանը:
Երևանի քաղաքապետ Տիգրան Ավինյանի խոսքով՝ այդ աշխատանքների շնորհիվ փաստացի մի շարք փողոցներում մալուխներն ամբողջությամբ կանցկացվեն գետնի տակ:
«Այստեղ պետք է համապարփակ ծրագրեր իրականացնենք մայթերի, մայթեզրերի և մնացած բոլոր հարցերով, որ ամբողջական տեսք ստանանք: Կարծում եմ, որ մեր այս ծրագրերի համադրումը շատ էֆեկտիվ է, որովհետև իրապես փողոցներն ամբողջովին նոր տեսք են ստանում, միջավայրը փոխվում է»,-ասաց քաղաքապետը:
