Պայմանավորվածություն կա, որ ՀՀ–ի և Ադրբեջանի սահմանազատման հանձնաժողովների հանդիպումները պետք է ինտենսիվ լինեն. փոխվարչապետ
1 րոպեի ընթերցում
Հայաստանի և Ադրբեջանի՝ սահմանազատման հարցերով հանձնաժողովների հանդիպումները, ըստ պայմանավորվածության, պետք է ինտենսիվ լինեն:
«Արմենպրես»-ի փոխանցմամբ՝ այս մասին լրագրողների հետ զրույցում ասաց Հայաստանի փոխվարչապետ Մհեր Գրիգորյանը:
Նա ընդգծեց, որ սահմանազատման վերաբերյալ ամբողջ տեղեկատվությունը հրապարակային է:
Անդրադառնալով հարցին, թե արդյոք սահմանազատումը Տավուշից է շարունակվելու՝ Գրիգորյանը պատասխանեց. «Հյուսիսային անկյունից է սկսվելու»:
Մինչև սահմանազատումը սկսվելը, ըստ փոխվարչապետի, դեռ հանձնաժողովների հանդիպում կլինի, քանի որ հարցեր կան քննարկելու:
Գրիգորյանը հանձնաժողովի հաջորդ հանդիպման կոնկրետ ամսաթիվ չնշեց:
«Բայց պայմանավորվածություն կա, որ ինտենսիվ պետք է լինեն հանդիպումները»,–ասաց փոխվարչապետը: