2 րոպեի ընթերցում
Ազգային ժողովի նախագահ Ալեն Սիմոնյանը վստահ է՝ տարածաշրջանում կոմունիկացիաների ապաշրջափակման համատեքստում Ադրբեջանը Նախիջևանին կապող ցանկացած ճանապարհ անվանելու է «միջանցք»:
«Արմենպրես»-ի հաղորդմամբ՝ Սիմոնյանն այս մասին ասաց ԱԺ–ում լրագրողների հետ զրույցում:
Նա վստահեցրեց, որ բանակցություններն այն տրամաբանության մեջ են, որ ապաշրջափակումը կլինի երկրների ինքնիշխանության ներքո: Նա նկատեց՝ միանշանակ է, որ Ադրբեջանի համար շատ կարևոր է իրենց էքսկլավի հետ կապը, և Հայաստանն իր վերաբերմունքն ու առաջարկները դրա հետ կապված ներկայացրել է:
Անդրադառնալով Ադրբեջանից հնչող հռետորաբանությանը՝ ԱԺ նախագահն ասաց.
«Ինչ ճանապարհ էլ լինի, մեր կողմից` ամենալավ պատկերացրած, իրենց կողմից` վատ պատկերացրած, իրենք դա անվանելու են «միջանցք»: Եկեք ֆիքսենք դա: Եթե անգամ 0 արտոնություն լինի, իրենք, միևնույն է, քաղաքական առումով ասելու են միջանցք: «Միջանցքը», որը չի լինի ՀՀ ինքնիշխանության ներքո, կլինի մեր օրենսդրությունից դուրս՝ մեզ համար անընդունելի է: Ինչ էլ լինի, ինչ էլ վերջում ստացվի, իրենք ասելու են՝ մենք մեր «միջանցքը» ստացանք: Իրենց պետք եղած ժամանակ իրենց մեկնաբանությունը ոնց ուզում՝ տալիս են»:
Սիմոնյանի խոսքով՝ «միջանցքի» խոսակցությունը բացվել է նրանից, որ նպատակ է եղել՝ ռուսական զորքեր բերել, որպեսզի նրանք վերահսկեն, այսպես կոչված, այդ «միջանցքը»: