2 րոպեի ընթերցում
Լիտվայի Սեյմասի փոխխոսնակ Յուոզաս Օլեկասը Հայաստանի և Ադրբեջանի միջև խաղաղության հաստատման գործընթացի համատեքստում դրական է գնահատում հայերի խաղաղասիրական ձգտումները:
Օլեկասն այս մասին ընդգծեց «Արմենպրես»-ի հետ զրույցում:
«Կարծում եմ, որ խաղաղությունը շատ կարևոր է բոլորի համար, քանի որ առանց խաղաղության դժվար է հասնել մնացած բոլոր բարեփոխումներին: Կարծում եմ, որ հայերի այս խաղաղասիրական ոգին շատ դրական է: Մենք պետք է գործենք միասին՝ Հայաստանի և Ադրբեջանի միջև համաձայնության հասնելու և այս խաղաղության գործընթացն ավելի լայնածավալ շարունակելու համար»,–ասաց Օլեկասը:
Անդրադառնալով հայ–լիտվական երկկողմ հարաբերություններին՝ Սեյմասի փոխխոսնակն ընդգծեց, որ Լիտվան և Հայաստանը երկկողմ համագործակցության բավականին երկար պատմություն ունեն:
Անդրադառնալով համագործակցության հնարավորություններին՝ նա նշեց որոշ ոլորտներում լիտվական փորձի փոխանակման մասին:
«Օրինակ՝ սահմանային վերահսկողությունը։ Մենք սկսեցինք վերահսկել մեր սահմանը՝ վերցնելով այն Խորհրդային միությունից և ստեղծեցինք սահմանապահ համակարգը Լիտվայում»,–ասաց Օլեկասը:
Նա նշեց նաև հարկային բարեփոխումների ոլորտում Լիտվայի գրանցած նշանակալի արդյունքների մասին:
«Մեր հարկային համակարգը թվայնացված է՝ ի շահ ժողովրդի։ Գիտեմ, որ Հայաստանում նույնպես այս գործընթացը սկսվում է: Եվ սովորաբար սկզբում դա բավականին դժվար է լինում: Մեր փորձը կարող է դրական լինել այս առումով»,–նշեց նա:
Ըստ Լիտվայի Սեյմասի փոխխոսնակի՝ փորձի փոխանակման ոլորտները շատ են, այդ թվում՝ առողջապահության ոլորտը: Նա նկատեց, որ Հայաստանում առողջության ապահովագրության ուղղությամբ են քայլեր իրականացվում:
«Մենք կարող ենք կիսվել մեր փորձառությամբ, այդ թվում՝ մեր փորձառությամբ, թե ինչպես ենք պատրաստվում ներդաշնակեցնել մեր օրենսդրությունը եվրոպական կարգավորումներին»,- նշեց նա: