ԵԱՏՄ-ում մեզ վատ չենք զգում, բայց չենք կարող չնկատել ՀՀ ապագայի համար տարբերակներ ձևավորելու ժողովրդի ձգտումները. Փաշինյան

Հայաստանը ԵԱՏՄ–ում իրեն վատ չի զգում, սակայն իշխանությունները չեն կարող չնկատել ժողովրդի ձգտումները Հայաստանի ապագայի համար ընտրանքներ, տարբերակներ ձևավորելու վերաբերյալ:  

«Արմենպրես»-ի հաղորդմամբ՝ այս մասին ասուլիսում ասաց Հայաստանի վարչապետ Նիկոլ Փաշինյանը:   

«Այսօր մենք ԵԱՏՄ-ում վատ չենք զգում մեզ: Բայց մյուս կողմից մենք չենք կարող չնկատել մեր ժողովրդի առնվազն որոշակի և շատ շոշափելի հատվածի ձգտումները՝ Հայաստանի ապագայի համար ձևավորել ընտրանքներ, տարբերակներ, որովհետև այսօր շատ կարևոր փուլ է, որ մենք մեր երկրի ռազմավարական ապագայի մասին խոսենք: Բայց այդ ռազմավարական ապագայի մասին խոսակցությունը չի կարող տեղի ունենալ, եթե ընտրանք չկա: Եվ մեր բալանսավորման և բալանասավորված արտաքին քաղաքականությունը նաև դրա համար է»,-ասաց Փաշինյանը:

Ըստ նրա՝ երկու տարբերակ կա: Առաջինը՝ ընտրություն չկա, մտածելու շատ բան էլ չկա: «Երկրորդը՝ պետք է ընտրություն ձևավորենք, որպեսզի ինչի վրա կանգնենք, այդ ընտրությունը լինի օրգանիկ, իրական, ոչ թե կեղծ: Մեր քաղաքականությունը դրան է ուղղված: Մենք շարունակելու ենք ճանապարհն այս ուղղությամբ: Այս ճանապարհն էլ է մի պրոցես, որտեղ իրական և անկեղծ բարեկամները ոչ իրական և ոչ անկեղծ բարեկամներից գուցե տարբերվեն»,-նշեց վարչապետը:

Անդրադառնալով ԵԱՏՄ-ի և Իրանի հարաբերությունների վերաբերյալ հարցին՝ Փաշինյանը վստահեցրեց, որ Հայաստանը աջակցել և աջակցում է, որ Իրանի և ԵԱՏՄ-ի հարաբերություններում զարգացումներ լինեն: 

Հայաստանի կառավարությունը հավանություն է տվել Եվրամիությանն անդամակցելու գործընթաց սկսելու վերաբերյալ օրինագծին, որը Հայաստանի խորհրդարանում քննարկվելու է առաջիկա լիագումար նիստում։ ՀՀ վարչապետը մեծ է համարել հավանականությունը, որ Հայաստանի խորհրդարանը ևս հավանություն կտա օրինագծին։ Այդ համատեքստում ՌԴ փոխվարչապետ Ալեքսեյ Օվերչուկը մի քանի անգամ հայտարարել է, որ Հայաստանի խորհրդարանի կողմից այդ օրինագծի ընդունումը կլինի ԵԱՏՄ-ից Հայաստանի դուրս գալու մեկնարկը։ ՌԴ փոխվարչապետը շեշտել է, որ Եվրամիությունն ու ԵԱՏՄ-ն անհամատեղելի կառույցներ են։