2 րոպեի ընթերցում
Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Իմանղալի Թասմաղամբետովի կարծիքով՝ Հայաստան-ԱՄՆ հարաբերությունների զարգացումը Երևանի ինքնիշխան իրավունքն է։
«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ վկայակոչելով Թասմաղամբետովի մեկնաբանությունը Հայաստանի և Միացյալ Նահանգների միջև ստորագրվելիք ռազմավարական գործընկերության համաձայնագրի մասին։
«Ընդհանուր առմամբ, Վաշինգտոնի հետ նման գործընկերության հաստատումը Հայաստանի Հանրապետության ինքնիշխան իրավունքն է երկկողմ հարաբերությունների զարգացման շրջանակներում։ Այդուհանդերձ, երկու կողմերի համար կարևոր է ելնել հավասար և անբաժանելի անվտանգության սկզբունքից. այսինքն՝ այս գործընկերությունը չպետք է անվտանգության սպառնալիքներ ստեղծի այլ պետությունների և միջազգային միությունների համար»,-նշել է ՀԱՊԿ գլխավոր քարտուղարը։
Ավելի վաղ, նմանատիպ կարծիք էին հայտնել ինչպես Ռուսաստանի Դաշնության արտաքին գործերի նախարար Սերգեյ Լավրովն, այնպես էլ ՌԴ նախագահի մամուլի խոսնակ Դմիտրի Պեսկովը՝ Երևանի և Վաշինգտոնի միջև հարաբերությունները համարելով Հայաստանի սուվերեն իրավունքը։
ՀՀ ԱԳ նախարարությունը հայտարարել է, որ Վաշինգտոնում հունվարի 14-ին ՀՀ արտաքին գործերի նախարար Արարատ Միրզոյանը և ԱՄՆ պետքարտուղար Էնթոնի Բլինքենը Հայաստանի Հանրապետության և Ամերիկայի Միացյալ Նահանգների միջև ռազմավարական գործընկերության մասին փաստաթուղթ կստորագրեն։