Հանրային տրանսպորտով արտոնյալ պայմաններով երթևեկելու իրավունք ունեցող երևանցիները հունվարի 9-ից կարող են դիմել համապատասխան փաթեթ ստանալու համար
2 րոպեի ընթերցում
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ: Երևանում հունվարի 9-ից ուժի մեջ մտնող տրանսպորտային նոր սակագներից արտոնությամբ օգտվելու իրավունք ունեցող քաղաքացիները կարող են ֆիզիկական անհպում վճարման հնարավորություն ունեցող անձնական բանկային քարտերով մոտենալ իրենց վարչական շրջանի թաղապետարան, նույնականացվել և արտոնյալ փաթեթը կցել բանկային քարտին։ Նույնը հնարավոր է անել transport.yerevan.am կայքում՝ առանց որևէ տեղ մոտենալու։
«Արմենպրես»-ի հաղորդմամբ՝ այս մասին հայտնել է Երևանի քաղաքապետի մամուլի քարտուղար Հայկ Կոստանյանը:
Նա նշել է, որ թաղապետարան անհրաժեշտ է մոտենալ անձը հաստատող փաստաթղթով և հանրային ծառայության համարանիշով։
«Եվս մեկ անգամ խնդրում ենք և հորդորում այն անձանց, որոնք ինքնուրույն կամ այլ անձի օգնությամբ կարող են նույնականացվել և արտոնյալ փաթեթները ձեռք բերել առցանց եղանակով, ցուցաբերել հոգատարություն դրա հնարավորությունը չունեցող քաղաքացիների նկատմամբ և լրացուցիչ չծանրաբեռնել սպասարկման գրասենյակները՝ հերթերի գոյացումից խուսափելու նպատակով»,- ընդգծել է նա։
Հայկ Կոստանյանը հայտնել է նաև, որ արտոնություն չունեցող անձանց կողմից նոր տոմսային փաթեթների ձեռքբերման եղանակների մասին կհայտարարվի առաջիկա օրերին։
Հավելյալ տեղեկատվություն հնարավոր է ստանալ transport.yerevan.am կայքում: