2 րոպեի ընթերցում
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ։ Եվրասիական տնտեսական բարձրագույն խորհրդի նիստում Հայաստանի Հանրապետության վարչապետ Նիկոլ Փաշինյանը հեռավար ելույթով ամփոփեց Հայաստանի նախագահության շրջանը ԵԱՏՄ կառույցներում և նշեց կատարված աշխատանքի հիմնական ուղղությունները։
«Արմենպրես»-ի հաղորդմամբ՝ Փաշինյանը ներկայացրեց, որ Հայաստանի նախագահության հիմնական առաջնահերթությունները կենտրոնացած են եղել տնտեսական համագործակցության առանցքային ուղղությունների վրա, ներառյալ՝ ընդհանուր էներգետիկ շուկաների ձևավորում, ԵԱՏՄ ներքին շուկայում խոչընդոտների վերացում, տրանսպորտային և լոգիստիկ ենթակառուցվածքների զարգացում, միջազգային կապերի ամրապնդում։
Նա ընդգծեց նաև կոոպերացիոն ներուժի զարգացումը, թվային տեխնոլոգիաների կիրառումն ու ագրոարդյունաբերական համալիրում նորարարական լուծումների ներդրումը՝ որպես նախագահության առաջնահերթ ուղղություններ։
Վարչապետը նշեց, որ Հայաստանի նախագահության շրջանի գործողությունների ծրագիրը հիմնվել է իր հունվարյան ուղերձում նշված ուղղությունների վրա։
«Ծրագիրը հագեցած էր և արտացոլում էր արդիական հարցեր։ Վստահ եմ, որ հանձնաժողովի անդամները մանրամասնորեն կքննարկեն ծրագրի իրականացման արդյունքները»,- ասաց Փաշինյանը։
Փաշինյանը հատուկ երախտագիտություն հայտնեց խորհրդի անդամներին և Եվրասիական տնտեսական հանձնաժողովի նախագահ Բակիտժան Սագինտաևի գլխավորած հանձնաժողովին՝ Հայաստանի նախաձեռնությունների իրագործմանը աջակցելու և կատարված աշխատանքի համար։
ՀՀ վարչապետը նշեց, որ այս նիստի ընթացքում քննարկվելու են մի շարք կարևոր և արդիական հարցեր, որոնք ուղղված են ԵԱՏՄ հետագա զարգացմանը։
Հայաստանի Հանրապետության վարչապետ Նիկոլ Փաշինյանը հեռավար նախագահում է Եվրասիական տնտեսական բարձրագույն խորհրդի նիստը։