4 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Ռեժիսոր Ելենա Արշակյանի «Նոր տարվա կինո»-ի գլխավոր հերոսուհին՝ Եվան, երազում է նկարահանվել ֆիլմում: Նա չի ընկճվում անհաջողություններից, չի հանձնվում և, հավատալով հեքիաթին, տոնածառի առեղծվածային խաղալիքները գտնելու օգնությամբ փորձում է իրականացնել իր ամենանվիրական երազանքը։
«Արմենպրես»-ի հաղորդմամբ՝ ֆիլմի պրեմիերային, որը տեղի ունեցավ նոյեմբերի 20-ին «Մոսկվա» կինոթատրոնում, ստեղծագործական կազմը շեշտեց, որ կինոնկարը երազանքներին հավատալու, դրանցից չհրաժարվելու մասին է։
Ընտանիքի բոլոր անդամների համար նախատեսված կինոնկարի շնորհիվ հանդիսատեսը ոչ միայն ծանոթանում է համակրելի, հոգատար, ընկճված, չար, միաժամանակ բարի և այլ հերոսների հետ, որոնցից յուրաքանչյուրը ձգտում է իրականացնել իր երազանքը, այլև նրանց հետ ճամփորդում է Հայաստանի տարբեր քաղաքներում, ծանոթանում տեղի ավանդույթներին, սովորույթներին ու առանձնահատկություններին։
«Կարծում եմ՝ մեզանից յուրաքանչյուրը հոգու խորքում հավատում է հրաշքին, իսկ հրաշքի համար ամենալավ ժամանակը Նոր տարին է։ Պետք է չդադարել երազել ու հավատալ հրաշքին»,-նշեց Ելենա Արշակյանը։
Նա շատ է ցանկանում, որ երեխաները դիտեն կինոնկարը, նորովի բացահայտեն իրենց երկիրը։
Արշակյանի խոսքով՝ Նոր տարվան վերաբերող ֆիլմերի բաց կա դաշտում։ Դա ևս նպաստել է թեմայի ընտրությանը։ Հույս ունի՝ իրենցից հետո նման ֆիլմերը կավելանան։
Ռեժիսորը խոստովանեց՝ ֆիլմի կայացմամբ իրականացավ նաև իր և սցենարիստ Անահիտ Մխիթարյանի երազանքը։
«Աշխարհում հեքիաթները բոլորիս համար են, և մեծերն ավելի շատ բան են սովորում հեքիաթներից։ Մեր ֆիլմի միակ ուղերձը սեփական երազանքը կարևորելն է»,-շեշտեց Անահիտ Մխիթարյանը։
Ֆիլմում Եվային մարմնավորում է Վիկտորյա Շամիրյանը, կինոնկարում նկարահանվել են Լիանա Վանոյանը, Մկրտիչ Արզումանյանը, Լիա Զախարյանը, Նվեր Սուքիասյանը, Գրետա Մեջլումյանը, Անահիտ Քոչարյանը, Զառա Սահակյանը, Արթուր Կարապետյանը, Արսեն Լևոնյանը, Ռաֆայել Հարությունյանը և այլք։
«Ֆիլմում նկարահանվելու առաջարկն առանց մտածելու ընդունեցի, քանի որ Ելենա Արշակյանի կինոնկարներն իմաստ ունեն։ Դիտելով ֆիլմը՝ հասկացա, որ եթե հավատաս ու պայքարես երազանքի համար, ստացվելու է ամեն բան, իսկ պարզապես նստել և երազելու պարագայում ոչինչ չի ստացվի»,-հավաստիացրեց դերասանուհին։
Վիկտորյան մանկուց է երազել դերասանուհի դառնալ, երբ վեց տարի առաջ Ելենա Արշակյանից սերիալում նկարահանվելու առաջարկ է ստացել, հավատացել է իր երազանքին։
«Նոր տարվա կինո»-ի նկարահանումների աշխարհագրությունն ընդարձակ է։ Նկարահանումներ են իրականացվել Լոռիում, Գեղարքունիքում, Շիրակում, Սյունիքում։ Նկարահանող խումբն անդրադարձել է նաև Լեռնային Ղարաբաղին՝ չմոռանալով նշել հայրենիքի կարևորությունը յուրաքանչյուրի կյանքում: Դերասանների միջոցով ներկայացվում են բարբառներն ու հումորը։ Ֆիլմում զբաղված դերասանները ներկայացնում են հենց իրենց մարզը։