Վրաստանի նախագահն առաջարկել է նոր խորհրդարանական ընտրություններ նշանակել

ԵՐԵՎԱՆ, 18 ՆՈՅԵՄԲԵՐԻ, ԱՐՄԵՆՊՐԵՍ: Վրաստանի նախագահ Սալոմե Զուրաբիշվիլին հայտարարել է, որ առաջարկում է նոր խորհրդարանական ընտրություններ նշանակել։

«Առաջարկում եմ հետևյալը՝ նախ նոր ընտրություններ նշանակել»,-ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ին, այս մասին նա նշել է նոյեմբերի 18-ին լրագրողների հետ հանդիպմանը՝ հավելելով, որ նոր ընտրությունները պետք է տեղի ունենան այն բանից հետո, երբ կհամալրվի նոր ընտրական հանձնաժողովը և կկարգավորվեն քվեարկության բոլոր ընթացակարգերը։

Նոյեմբերի 16-ին Վրաստանի Կենտրոնական ընտրական հանձնաժողովը հրապարակել է հոկտեմբերի 26-ին անցկացված խորհրդարանական ընտրությունների ամփոփիչ արձանագրությունը, որի համաձայն՝ հաղթել է իշխող «Վրացական երազանք» կուսակցությունը՝ հավաքելով ձայների 53, 93 տոկոսը և խորհրդարանում ստանալով 150 մանդատից 89։ Խորհրդարան են անցել նաև չորս ընդդիմադիր կուսակցություններ, բայց նրանք չեն ճանաչում ընտրությունների արդյունքները և հրաժարվում են պատգամավորական տեղերից։ Խորհրդարանը պետք է հավաքվի ոչ ուշ, քան նախագահի կողմից գումարման ամփոփիչ արձանագրության հրապարակումից տասն օր հետո, սակայն եթե նախագահը հրաժարվի խորհրդարանը գումարելուց, օրենսդիր մարմինը կհավաքվի ինքնուրույն:

Ընդդիմադիրներն արդյունքները համարում են կեղծված, պահանջում են միջազգային հետաքննություն և նոր խորհրդարանական ընտրություններ։

Վրաստանի դատախազությունը հետաքննություն է սկսել ընտրությունների արդյունքների ենթադրյալ կեղծման հարցում ընդդիմության պնդումների կապակցությամբ, սակայն ընդդիմադիրների մեծ մասը չի համագործակցում գերատեսչության հետ։