ԵԱՏՄ-ն և ԱՄԷ-ն համաձայնության են եկել առևտրի և ներդրումների ընդլայնման շուրջ
2 րոպեի ընթերցում
ԵՐԵՎԱՆ, 14 ՆՈՅԵՄԲԵՐԻ, ԱՐՄԵՆՊՐԵՍ: Արաբական Միացյալ Էմիրությունները և Եվրասիական տնտեսական միությունը (ԵԱՏՄ) համաձայնության են եկել առևտրի և ներդրումների ոլորտում համագործակցության ընդլայնման շուրջ։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտարարել է ԱՄԷ արտաքին առևտրի պետնախարար Թանի բեն Ահմեդ ազ Զեյուդին։
«Սեպտեմբերին ես այցելեցի Մոսկվա՝ Եվրասիական տնտեսական հանձնաժողովի առևտրի նախարար Անդրեյ Սլեպնյովի հետ բանակցություններ վարելու: Մենք համաձայնության եկանք առևտրի ընդլայնման և ներդրումների ավելացման շուրջ, ինչպես նաև հաստատեցինք մեր մտադրությունը շարունակել համապարփակ տնտեսական գործընկերության համաձայնագրի վերջնական ձևակերպման աշխատանքը», - ասել է նախարարը՝ ելույթ ունենալով Դուբայում «Հնարավորությունների աշխարհ» համաժողովի բացմանը։
Մի քանի տարվա ընթացքում ԱՄԷ-ն կնքել է ավելի քան տասը համապարփակ տնտեսական գործընկերության համաձայնագիր, այդ թվում՝ Իսրայելի, Հնդկաստանի, Ինդոնեզիայի, Քենիայի և Թուրքիայի հետ: Փետրվարին ազ Զեյուդին ՏԱՍՍ-ին հայտնել էր, որ երկրի իշխանությունները ԵԱՏՄ-ի հետ նմանատիպ համաձայնագիր կկնքեն մինչև 2024 թվականի վերջը։
ԵԱՏՄ-ն միջազգային ինտեգրացիոն տնտեսական միավորում է, որի անդամներն են Հայաստանը, Ռուսաստանը, Բելառուսը, Ղազախստանը և Ղրղզստանը։ Դիտորդի կարգավիճակ է տրամադրվել Կուբային, Մոլդովային և Ուզբեկստանին: