ՔՊ-ն ՀԾԿՀ նախագահի թեկնածուի առաջ խնդիր է դրել լուծել էլեկտրաէներգիայի անջատումների հարցը. Պապոյան
2 րոպեի ընթերցում
ԵՐԵՎԱՆ, 6 ՆՈՅԵՄԲԵՐԻ, ԱՐՄԵՆՊՐԵՍ: «Քաղաքացիական պայմանագիր» կուսակցությունը Հանրային ծառայությունները կարգավորող հանձնաժողովի նախագահի թեկնածուի առաջ խնդիր է դրել լուծել նաև էլեկտրաէներգիայի պարբերական անջատումների խնդիրը:
«Արմենպրես»-ի փոխանցմամբ՝ այս մասին լրագրողների հետ զրույցում ասաց կուսակցության վարչության փոխնախագահ, Էկոնոմիկայի նախարար Գևորգ Պապոյանը:
«Քաղաքացիական պայմանագիր» կուսակցության վարչությունը նոյեմբերի 5-ին որոշել էր կառավարությանն առաջարկել քննարկել Մեսրոպ Մեսրոպյանի թեկնածությունը՝ որպես ՀԾԿՀ նախագահի թեկնածու։
«Կառավարությունը խնդիր ունի նրա հետ, որ Հայաստանում կարող է լույսը անջատվել ցերեկը կամ գիշերը... Այն թեկնածուին, ում առաջարկել ենք, նաև նրա առաջ խնդիր ենք դրել այդ հարցերը բարձրացնել ու լուծել»,-ասաց Պապոյանը:
Նա ընդունելի է համարում թեկնածուի ներկայացրած տեսլականի տրամաբանությունը, մասնավորապես ներդրումների բովանդակության վրա ուշադրություն դարձնելը:
«Մենք որպես քաղաքական հանձնառություն խնդիր ենք դրել այնպես անել, որ մեր բնակիչները գազի, ջրի, էլեկտրաէներգիայի հնարավորինս մեծ հասանելիություն ունենան, եթե անջատումներ կան, դրանք մաքսիմալ քիչ ու հիմնավորված լինեն: Պետք է այնպես անենք, որ գնագոյացման համակարգը լինի մաքսիմալ թափանցիկ, մաքսիմալ հասկանալի: Ամեն ինչն էլ կարող է բարձրանալ, կարող է իջնել, խնդիրն այն է, որ գինը լինի արդար, բոլորի համար հասկանալի, և համակարգը գործի անկախ»,-ասաց նա: