Վրաստանի ընտրատեղամասերից մեկում հանձնաժողովի անդամ է մահացել

ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ։ Վրաստանի Փոթի նավահանգստային քաղաքի (Սամեգրելո-Զեմո Սվանեթի շրջան) թիվ 15 ընտրատեղամասում խորհրդարանական ընտրությունների ժամանակ ծառայողական պարտականությունները կատարելիս մահացել է ընտրական հանձնաժողովի անդամը։

«Արմենպրես»-ի հաղորդմամբ՝ այս մասին ճեպազրույցի ժամանակ հայտարարել է Կենտրոնական ընտրական հանձնաժողովի (ԿԸՀ) մամուլի խոսնակ Նատիա Իոսելիանին։

«Փոթիի 15-րդ ընտրատեղամասի անդամ Նիկոլոզ Լոմիձեի ինքնազգացողությունը վատացել է: Նրան տեղափոխել են հիվանդանոց, բայց, ցավոք, նա մահացել է: Ընտրական հանձնաժողովը ցավակցում է նրա ընտանիքին»,- ասել է Իոսելիանին։

Վրաստանում անցկացվում են խորհրդարանական ընտրություններ։

Ընտրողները պետք է ընտրություն կատարեն 18 կուսակցություններից։ Վրաստանի խորհրդարան կանցնեն այն կուսակցությունները, որոնց օգտին կքվեարկի ընտրողների առնվազն 5 տոկոսը։ Թե ինչպես են մանդատները բաշխվելու ընտրական շեմը հաղթահարած կուսակցությունների միջև, հայտնի կդառնա այն բանից հետո, երբ Կենտրոնական ընտրական հանձնաժողովը կամփոփի ընտրությունների վերջնական արդյունքները՝ քննարկելով բոլոր բողոքները և սպասելով, որ դատարանները կորոշեն դիտորդների բողոքները, եթե այդպիսիք կան։

Նշվում է, որ ընտրական գործընթացը վերահսկում են ավելի քան 1700 դիտորդներ միջազգային կազմակերպություններից, ինչպես նաև ավելի քան 23 հազար դիտորդներ 111 տեղական կազմակերպություններից։

Հաղորդվում է, որ քվեարկության գործընթացը կտևի մինչև ժամը 20:00-ն, որից հետո ընտրական հանձնաժողովները կսկսեն ձայների հաշվարկը։ Քվեարկության առաջին արդյունքները կհրապարակվեն տեղամասերի փակումից 2-3 ժամ անց։ 

ՎրաստանիԿԸՀ-ում ամփոփիչ ճեպազրույցը նշանակված է ժամը 22:00-ին։