2 րոպեի ընթերցում
ԵՐԵՎԱՆ, 15 ՀՈԿՏԵՄԲԵՐԻ, ԱՐՄԵՆՊՐԵՍ։ Երևանի ավագանու «Հանրային ձայն» խմբակցության ղեկավար է ընտրվել Արամ Թորոսյանը։
«Արմենպրես»-ի հաղորդմամբ՝ այս մասին Երևանի ավագանու հոկտեմբերի 15-ի նիստում տեղեկացրեց քաղաքապետ Տիգրան Ավինյանը։
Նա հավելեց, որ ՀՀ կենտրոնական ընտրական հանձնաժողովի 2024 թվականի սեպտեմբերի 11-ի արձանագրության համաձայն՝ «Հանրային ձայն» կուսակցության ընտրական ցուցակից ընտրված և լիազորությունները վաղաժամկետ դադարած ավագանու անդամների մանդատներն էլ տրվել են կուսակցության ընտրական ցուցակի հաջորդ թեկնածուներ Լուսինե Բադալյանին և Դիանա Ալեքյանին։
Իր դիմումի համաձայն՝ Դիանա Ալեքյանը դուրս է եկել«Հանրային ձայն» խմբակցության կազմից՝ պահպանելով ավագանու անդամի իր լիազորությունները։
«Ազգային առաջընթաց» կուսակցության ընտրական ցուցակից ընտրված և լիազորությունները վաղաժամկետ դադարած ավագանու անդամի մանդատն էլ տրվել է ընտրացուցակի հերթական հաջորդ թեկնածու Վահագն Իսոյանին, ով դիմում է ներկայացրել ավագանու անդամի իր լիազորությունները դադարեցնելու մասին։
Համաձայն ԿԸՀ-ի արձանագրության՝ լիազորությունները դադարած ավագանու անդամի մանդատը տրվել է կուսակցության ընտրացուցակի հաջորդ թեկնածու Մուշեղ Հակոբյանին։