Ցանկության և անհրաժեշտության դեպքում լաստանավային հաղորդակցությունը նորից կգործարկվի. նախարար
2 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Եթե կարիք լինի, ապա Լարսի անցակետին որպես այլընտրանք ծառայող լաստանավային հաղորդակցությունը նորից կգործարկվի:
«Արմենպրես»-ի փոխանցմամբ՝ այս մասին ՀՀ կառավարության նիստից հետո լրագրողների հետ զրույցում ասաց ՀՀ էկոնոմիկայի նախարար Գևորգ Պապոյանը:
«Լարսին այլընտրանք, իհարկե, կա: Լաստանավը Լարսի այլընտրանքային տարբերակն է»,-ասաց Պապոյանը:
Անդրադառնալով հարցին, թե ինչո՞ւ հիմա չի աշխատում՝ նախարարը պատասխանեց, որ հիմա պետք չէ: «Ինչո՞ւ աշխատենք, անիմաստ փող ծախսենք: Եթե ուզենանք և կարիք լինի, նորից կգործարկվի: Այն պահին տնտեսապես օգտավետ էր, կառավարությունն աջակցեց տնտեսվարողներին և այդ հնարավորությունը տվեց, հետո դարձավ տնտեսապես ոչ նպատակահարմար, որովհետև Լարսի թողունակությունն ավելացավ»,-նշեց նախարարը:
Անդրադառնալով Լարսում պարբերաբար բեռնատարների կուտակումներին՝ Պապոյանն ասաց, որ նման խնդիրներն առաջանում են տարբեր պատճառներով, օրինակ՝ քարաթափման կամ վերանորոգման աշխատանքների:
Լաստանավային հաղորդակցությունը, որը պետք է Վերին Լարսի անցակետին այլընտրանք լիներ և թույլ տար հայկական բեռները հասցնել Ռուսաստան, գործարկվել և աշխատել է մի քանի ամիս: Էկոնոմիկայի՝ արդեն նախկին նախարար Վահան Քերոբյանը պարզաբանել էր, որ այն արտահանողների և ներմուծողների համար բավարար հետաքրքրություն չէր առաջացրել: