Հայաստանի պատվիրակները Պեկինում մասնակցել են Միջազգային բիզնեսի պաշտոնյաների ակադեմիայի սեմինարին

ՊԵԿԻՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ։ Պեկինում սեպտեմբերի 3-ից 16-ն անցկացվեց Համաշխարհային զարգացման նախաձեռնության շրջանակներում կլիմայի փոփոխության և կանաչ զարգացմանն ուղղված սեմինարը, որը կազմակերպել էր Չինաստանի առևտրի նախարարության ենթակայության տակ գործող Միջազգային բիզնեսի պաշտոնյաների ակադեմիան (AIBO):

«Արմենպրես»-ի փոխանցմամբ, մասնակցության համար հրավիրված էին ներկայացուցիչներ տարբեր երկրներից, այդ թվում՝ Հայաստանից, Շրի Լանկայից, Հարավաֆրիկյան Հանրապետությունից, Լաոսից և այլ երկրնրից։

Բացման արարողությանը մասնակիցներին ողջունել է «Չինաստանի օգնություն» կրթական ծրագրերի գործադիր վարչության տնօրեն Տուան Վեյխուան,։ Բացման խոսքով է հանդես եկել հայ պատվիրակը:

14-օրյա այցի ընթացքում մասնակիցները հնարավորություն ունեցան ականատես լինելու կլիմայի փոփոխության դեմ պայքարի և կանաչ զարգացման խթանման գործում Չինաստանի գործնական փորձին: Սեմինարը ներառում էր դասախոսություններ և այցելություններ՝ մասնակիցներին թույլ տալով ուղղակիորեն հետևել Չինաստանի փորձառությանը: Պատվիրակներն այցելեցին «LONGi»՝ Չինաստանում արևային տեխնոլոգիաների խոշորագույն ընկերություն, Բամբուկի և եղեգնարմավի միջազգային կենտրոն, ինչպես նաև Ազգային օդերևութաբանական կենտրոն։ 

Մասնակիցներն ուշադիր հետևեցին Չինաստանի կանաչ զարգացման ռազմավարությանը, որը ենթադրում է մինչև 2060 թվականը հասնել ածխածնի արտանետման չեզոք վիճակի, իսկ մինչև 2030 թվականը՝ ածխածնի արտանետումների առավելագույն մակարդակի: Մասնակիցները քննարկումների միջոցով փորձեցին հասկանալ, թե ինչպես կարող են այլ զարգացող երկրները օգուտ քաղել Չինաստանի փորձից և ինչպես կարող են նմանատիպ առաջընթաց գրանցել իրենց երկրներում։

Բացի այդ, պատվիրակները հնարավորություն ունեցան զգալու չինական մշակույթը։ Նրանք այցելեցին Սիանում գտնվող Կայսր Ցին Շի Հուանդի դամբարան-թանգարանը և Չինական Մեծ պատը: