Զելենսկին հայտնել է, որ Ռուսաստանի հետ պատերազմն ավարտելու պլան ունի
1 րոպեի ընթերցում
![Զելենսկին հայտնել է, որ Ռուսաստանի հետ պատերազմն ավարտելու պլան ունի](http://armenpress.am/resized/480/storage/images/articles/2024/08/27/FdDq5s13Kk7aK7XBLuaCUeyyuFY0xk1Ea4rdcM0o.webp)
ԵՐԵՎԱՆ, 27 ՕԳՈՍՏՈՍԻ, ԱՐՄԵՆՊՐԵՍ։ Ուկրաինայի նախագահ Վոլոդիմիր Զելենսկին հայտարարել է, որ պատրաստվում է ԱՄՆ-ին ներկայացնել ծրագիր այն մասին, թե ինչպես է մտադիր ավարտել Ռուսաստանի հետ պատերազմը։ «Արմենպրես»-ի փոխանցմամբ՝ այս մասին նա հայտնել է «Ուկրաինա 2024: Անկախություն» ֆորումի շրջանակներում անցկացված մամուլի ասուլիսի ժամանակ։
Նա նշել է, որ պատրաստվում է պատերազմի ավարտի մասին ծրագիրը ներկայացնել ինչպես ԱՄՆ նախագահ Ջո Բայդենին, այնպես էլ նախագահի թեկնածուներ Քամալա Հարիսին և Դոնալդ Թրամփին։
Զելենսկին հայտնել է, որ ուկրաինական ուժերի ներխուժումը Կուրսկի մարզ այդ ծրագրի փուլերից մեկն է։ Ուկրաինայի նախագահի խոսքով՝ իր ծրագիրը ներառում է նաև լրացուցիչ քայլեր դիվանագիտական և տնտեսական ճակատում, այդ թվում՝ հզոր փաթեթ, որը կստիպի Ռուսաստանին պատերազմն ավարտել դիվանագիտական ճանապարհով։
Զելենսկին նաև նշել է, որ Կուրսկի մարզում գործողության շնորհիվ Ուկրաինան կանխել է Խարկովի, Սումիի և Չեռնիգովի մարզերի օկուպացման վտանգը։ Նա հայտնել է, որ շատ քիչ մարդիկ գիտեին այդ գործողության մասին։