ԱՄՆ պետքարտուղարը կարծում է, որ Հայաստանն ու Ադրբեջանը շատ մոտ են վերջնական համաձայնության հասնելուն
2 րոպեի ընթերցում
ԵՐԵՎԱՆ, 10 ՀՈՒԼԻՍԻ, ԱՐՄԵՆՊՐԵՍ։ Վերջին մեկուկես տարվա ընթացքում Հայաստանն ու Ադրբեջանը շատ կարևոր աշխատանք են կատարել բանակցությունների և խաղաղության համաձայնագրի կնքման ուղղությամբ։
ԱՄՆ-ի Պետքարտուղար Էնթոնի Բլինկենի խոսքերն է մեջբերում «Արմենպրես»-ը՝ վկայակոչելով Միացյալ Նահանգների պետդեպարտամենտի պաշտոնական կայքում զետեղված հաղորդագրությունը։
«Համաձայնագիրը երկարաժամկետ է, արժանապատիվ։ Այն բացառիկ հնարավորություններ կբացի երկու երկրների, տարածաշրջանի և Միացյալ Նահանգների հետ իրենց հարաբերությունների համար: Ադրբեջանն ու Հայաստանը կիսում են այս տեսակետը: Սույն գործընթացի ընթացքում Միացյալ Նահանգները ձգտել է օգնել և աջակցել կողմերին՝ Եվրամիության և Եվրոպայի բազմաթիվ գործընկերների հետ միասին»,- ասել է Բլինկենը` Վաշինգտոնում Հայաստանի ու Ադրբեջանի արտգործնախարարների հանդիպումից առաջ։
ԱՄՆ-ի պետքարտուղարի կարծիքով՝ այսօրվա հանդիպումն առիթ է արձանագրելու այն առաջընթացը, որը ձեռք է բերվել կողմերի միջև:
«Ելնելով այն բոլոր պարտավորություններից, որոնք մենք ունեցել ենք, այդ թվում՝ վերջին շաբաթների ընթացքում, ես կարծում եմ, որ երկու երկրները շատ մոտ են վերջնական համաձայնության հասնելուն, ինչին Միացյալ Նահանգները վճռականորեն կաջակցի: Այնպես որ, ես շատ շնորհակալ եմ այսօրվա հանդիպման մասնակիցներին, որպեսզի նորից գնահատեմ, թե որտեղ ենք մենք և տեսնել, թե ավելին ինչ կարող է անել Միացյալ Նահանգները, որպեսզի օգնի ձեզ համաձայնության հասնելու համար: Շնորհակալություն երկուսիդ էլ այստեղ լինելու համար»,- եզրափակել է պետքարտուղար Բլինկենը:
Հուլիսի 10-ին Վաշինգտոնում ՆԱՏՕ-ի կազմավորման 75-ամյակին նվիրված գագաթաժողովի շրջանակներում ԱՄՆ-ի պետքարտուղար Էնթոնի Բլինկենի նախաձեռնությամբ և մասնակցությամբ տեղի է ունեցել ՀՀ ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի հանդիպումը: