«Օրրան»-ում ավանդական տոնակատարությամբ նշեցին հունիսի 1-ը. երեխաներին հյուրընկալվել էր Նազիկ Ավդալյանը

ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Երեխաների պաշտպանության միջազգային օրն ավանդական դարձած տոնական միջոցառմամբ նշեցին «Օրրան» բարեգործական հասարակական կազմակերպությունում: Մանուկների ընտրությամբ՝ այս տարի տոնակատարության պատվավոր հյուրն էր կանանց ծանրամարտի աշխարհի առաջնության հայ առաջին չեմպիոնուհի, Եվրոպայի առաջնությունների կրկնակի հաղթող և արծաթե մեդալակիր Նազիկ Ավդալյանը:

«Արմենպրես»-ի հաղորդմամբ՝ երեխաները ողջույնի ուրախ խոսքերով դիմավորեցին մրցահարթակի թագուհուն և անմիջապես օրը խորհրդանշող փոքրիկ «սմայլիկ» փակցրեցին նրա այտին: Նազիկ Ավդալյանը դժվարությամբ էր թաքցնում հուզմունքը նման ջերմ ընդունելությունից: Դե, իսկ «Օրրան»-ի հիմնադիրներ Արմինե և Րաֆֆի Հովհաննիսյանների անկեղծ շփումն արագորեն վերացրեց Նազիկի ակնթարթային շփոթվածությունը: Այնուհետև, չեմպիոնուհուն խնդրեցին մոտենալ հենց կազմակերպության բակում տեղադրված օջախին ու, հավատարիմ մնալով տարիների ընթացքում ձևավորված ավանդույթին՝ տապակել համբուրգերների մսային միջուկը: Այդ երեկո երեխաները և միջոցառման հյուրերը վայելեցին Նազիկ Ավդալյանի ձեռամբ փայտածուխի վրա պատրաստված անուշահամ ուտեստը:

Արմինե Հովհաննիսյանն «Արմենպրես»-ի թղթակցի հետ զրույցում նշեց, որ պատվավոր հյուրերի ներգրավմամբ երեխաների համար համբուրգերներ պատրաստելու ավանդույթը վաղուց է ձևավորվել «Օրրան»-ում: Դա, իհարկե, տոնն ամբողջացնող դրվագներից մեկն է միայն:

«Միշտ մեծ շուքով ենք նշել Երեխաների պաշտպանության միջազգային օրը: «Օրրան»-ն արդեն 25 տարեկան է. այդ ընթացքում հունիսի 1-ին միշտ տոնական մթնոլորտ է տիրել մեզ մոտ: Հրավիրել ենք տարբեր հյուրերի, այդ թվում՝ անվանի մարդկանց: Այս անգամ մեր գլխավոր հյուրն է Նազիկ Ավդալյանը, որին հրավիրել ենք հենց երեխաների ցանկությամբ: Ցանկանում ենք, որ երեխաները հնարավորինս շատ ունենան հիշարժան և ուրախ օրեր: Ուզում ենք, որ մեր հայրենիքն ապահով լինի նրանց համար: Երեխաները միշտ լինեն սիրված, հոգատարության պակաս չզգան և, իհարկե, դառնան մեր երկրի լավ քաղաքացիներ»,- նշեց Արմինե Հովհաննիսյանը:

«Ժառանգություն» կուսակցության հիմնադիր Րաֆֆի Հովհաննիսյանը կարևորեց Երեխաների պաշտպանության օրվա խորհուրդը:

«Սիրո օր է՝ մեր անցյալի ժառանգությանն ու ապագայի բարօրությանը, խաղաղությանն ու ազատությանը միտված տոն: Ցանկանում եմ, որպեսզի մեր երեխաները դառնան հայրենիքի լիարժեք քաղաքացիներ՝ լավ մարդիկ, ուժեղ հայեր: Ինչպես աշխարհի բոլոր երեխաները, հայ մանուկները նույնպես արժանի են հրապարակային գնահատանքի և սիրո արտահայտության»,- «Արմենպրես»-ին հայտնեց Րաֆֆի Հովհաննիսյանը:

Շտապեցինք արդեն ծխի շղարշով պարուրված Նազիկ Ավդալյանի հետ զրույցի: «Բոլոր երեխաներին շնորհավորում եմ այս հրաշալի տոնի կապակցությամբ: Մաղթում եմ ուրախ, վառ, գեղեցիկ, լուսավոր, հեքիաթներով և հրաշքներով լի մանկություն: Թող նրանք երբեք չունենան տխրելու առիթ, կարողանան լիարժեք, լիաթոք վայելել իրենց մանկությունը: Ու շատ կուզենայի, որ նման ջերմ պահերը հնարավորինս շատ լինեն նրանց կյանքում: Մանկությունը շատ կարևոր շրջան է յուրաքանչյուր մարդու կյանքում, անձի ձևավորման կարևոր փուլ է, որն օգնում է ձեռք բերել իրական, ճիշտ արժեքներ և հետագայում դառնալ կայացած քաղաքացի»,- ասաց Նազիկ Ավդալյանը:

Նա հայտնեց նաև, որ հնարավորինս հաճախ է մասնակցում նման միջոցառումների. «Սիրում եմ մասնակցել երեխաներին առնչվող միջոցառումների: Շատ կարևորում եմ դրանք և պատկերացրեք՝ սա նրանց հետ հանդիպման իմ ամենասիրած ձևաչափն է: Մեծ բավականություն եմ ստանում և շատ ուրախ եմ լինում, եթե որևէ կերպ կարողանում եմ օգտակար լինել երեխաներին»:

Նազիկ Ավդալյանը խոստովանեց, որ վերջին շրջանում որևէ կապ չունի սպորտի հետ, սակայն առիթի դեպքում փորձում է իր խորհուրդներով և այլ միջոցներով հնարավորինս օգտակար լինել հայ մարզիկներին և ապագայի հերթափոխին:

Արձագանքելով երեխաների հարցադրմանը՝ Նազիկ Ավդալյանը ներկայացրեց հաջողության իր բանաձևը:

«Շատ կարևոր է երազելն ու նպատակ ունենալը: Դա է իմ հաջողության գաղտնիքը: Ուզում եմ, որ դուք շատ երազեք և ձեր բոլոր երազանքներն անխտիր իրականանան: Համոզված եղեք, որ այդպես էլ կլինի: Պարզապես՝ միշտ երազեք: Երազեք շատ ու անդադար: Ձեզ անչափ շատ եմ սիրում ու ուրախ եմ օրս այսօր ձեզ հետ անցկացնելու համար»,- հայտարարեց աշխարհի չեմպիոնուհին:

Հեղինակ՝ Հրայր Նազարյան

Լուսանկարները՝ Հայկ Բադալյանի