Ազատազրկված անձանց և նրանց երեխաների մասնակցությամբ միջոցառում է անցկացվել
2 րոպեի ընթերցում
![Ազատազրկված անձանց և նրանց երեխաների մասնակցությամբ միջոցառում է անցկացվել](http://armenpress.am/resized/480/static/news/b/2024/06/1138550.jpg)
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Երեխաների պաշտպանության միջազգային օրվա կապակցությամբ ՀՀ ԱՆ քրեակատարողական ծառայության կենտրոնական մարմնի սոցիալական, հոգեբանական և իրավական աշխատանքների բաժնի և ՀՀ ԱՆ «Արմավիր» քրեակատարողական հիմնարկի ՍՀԻԱ բաժնի օժանդակությամբ ազատազրկված անձանց և նրանց երեխաների մասնակցությամբ իրականացվել է մեկօրյա խմբային հոգեբանական աշխատանք և միջոցառում։
«Արմենպրես»-ի հաղորդմամբ՝ այս մասին հայտնում են Արդարադատության նախարարության քրեակատարողական ծառայությունից:
Նմանատիպ ձևաչափով միջոցառում ազատազրկված անձանց համար կազմակերպվում էր առաջին անգամ։ Միջոցառման բուն նպատակն է եղել խմբային հոգեբանական աշխատանքի և ազատ շփման միջոցով նպաստել ազատազրկված անձանց և նրանց երեխաների միջև հարաբերությունների առավել ամրապնդմանը, հուզական կապվածության պահպանմանը, վերասոցիալականացման միջոցառումներին ակտիվորեն մասնակցող ազատազրկված անձանց դրական վարքի ձևավորմանը։
Կազմակերպիչների կողմից միջոցառումն իրականացվել է երկու հատվածներով՝ խմբային հոգեբանական աշխատանք, որը վարել են ՍԻԱՀ բաժնի աշխատակիցները, և ազատ ժամանց։ Միջոցառման առաջին հատվածն անցկացվել է տարբեր հոգեբանական խաղային մեթոդների, քննարկումների միջոցով, որից հետո՝ երկրորդ փուլում, երեխաների համար կազմակերպվել են հետաքրքիր խաղեր, հյուրասիրություն և ազատ շփում իրենց հայրերի հետ։
Միջոցառման ավարտին ազատազրկված անձինք երախտիքի խոսքեր են հայտնել կազմակերպիչներին՝ երեխաների և իրենց օրն այդքան հագեցած և հիշարժան դարձնելու համար։