Պետական բյուջեի պակասուրդը 2023 թվականին պլանավորվածից ցածր է եղել. նախարար

ԵՐԵՎԱՆ, 29 ՄԱՅԻՍԻ, ԱՐՄԵՆՊՐԵՍ: Հայաստանի պետական բյուջեն 2023 թվականին ունեցել է 2 տոկոս պակասուրդ՝ պլանավորված 3.1 տոկոսի դիմաց:

«Արմենպրես»-ի փոխանցմամբ՝ այս մասին ասաց Ֆինանսների նախարար Վահե Հովհաննիսյանը ԱԺ մշտական հանձնաժողովների համատեղ նիստում «Հայաստանի Հանրապետության 2023 թվականի պետական բյուջեի կատարման մասին» տարեկան հաշվետվության քննարկմանը:

«Պետական բյուջեն 2023 թվականին ունեցել է 2 տոկոս պակասուրդ՝ պլանավորված 3.1 տոկոսի դիմաց: 2023 թվականին պարտք–ՀՆԱ ցուցանիշը կազմել է 48.1 տոկոս՝ նախորդ տարվա նկատմամբ աճելով 1.4 տոկոսային կետով, սակայն կանխատեսվածից ցածր լինելով 1.7 տոկոսային կետով»,–ասաց Վահե Հովհաննիսյանը:

Նախարարը հիշեցրեց, որ 2023–ի դեկտեմբերին ՀՀ կառավարությունը ստանձնել է Լեռնային Ղարաբաղի կառավարության կողմից Հայաստանի ֆինանսական հատվածի նկատմամբ ունեցած պարտքը, որը Հայաստանի պարտքն ավելացրել է 2.2 տոկոսով: Եթե այդ ավելացումը չլիներ, պարտքն ավելի ցածր կլիներ 2022 թվականի պարտքի մակարդակից:

Հովհաննիսյանը նաև նշեց, որ 2023 թվականի ընթացքում կանխատեսվածից բարձր տնտեսական աճի պայմաններում Կառավարությունը պլանավորված չեզոք հարկաբյուջետային քաղաքականության դիրքի փոխարեն ունեցել է զսպող դիրք՝ միևնույն ժամանակ իրականացնելով տնտեսական ներուժի բարձրացմանը միտված միջոցառումներ և նպաստելով պարտքի կայունության ապահովմանը: