Ան Լորանս Պետելը Ֆրանսիայի վարչապետին կոչ է արել հակազդել Ադրբեջանի քայլերին, որոնք կասկածի տակ են դնում երկրի ամբողջականությունը 

ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ։ Ֆրանսիայի Ազգային ժողովի պատգամավոր Ան Լորանս Պետելը նամակ է հղել երկրի վարչապետ Գաբրել Ատալին՝ կոչ անելով հակազդել Ադրբեջանի գործողություններին, որոնք կասկածի տակ են դնում Ֆրանսիայի ամբողջականությունը։

«Արմենպրես»֊ը ներկայացնում է պատգամավորի նամակն ամբողջությամբ։

«Նախորդ տարվա մարտի 27-ին Ազգային ժողովն առաջին ընթերցմամբ ընդունեց Ֆրանսիայում օտարերկրյա միջամտության կանխարգելմանն ուղղված օրինագիծը: Եթե Ռուսաստանի գործողություններն այսօր առավել նկատելի են, ապա ադրբեջանական վարչախումբը զբաղվում է նաև մեր երկրի ապակայունացմանն ուղղված գործողություններով, որոնք մենք պարտավոր ենք դատապարտել:

Դրանք սկիզբ առան անցյալ տարվա հուլիսի 26-ին և 27-ին և ընդունեցին Ֆրանսիայի դեմ ապատեղեկատվության և սևացման լայնածավալ արշավի ձև: Կեղծ օգտահաշիվների միջոցով տարածվել է առնվազն 1600 բացասական հաղորդագրություն ՝ կոչ անելով բոյկոտել 2024 թվականի Փարիզի Օլիմպիական խաղերը:

Եթե ավելի լուրջ, ապա ներկայումս Բաքվի վարչախումբը փորձում է խարխլել Ֆրանսիայի Հանրապետության միասնությունը ՝ աջակցելով անջատողականության ձգտմանը մետրոպոլիայի և Անդրծովյան մի շարք տարածքներում: Անցյալ տարվա հունվարին Ադրբեջանի Ազգային ժողովի արտաքին հարաբերությունների հանձնաժողովը հրապարակայնորեն միանշանակ դիրքորոշում էր որդեգրել Կորսիկայի, Նոր Կալեդոնիայի և Ֆրանսիական Պոլինեզիայի անկախությունը սատարելու օգտին:

Ադրբեջանական ռեժիմի ակտիվությունն արտահայտվում է նաև Անդրծովյան տարածքներում, հատկապես Նոր Կալեդոնիայում անկախության շարժումներին աջակցելու մեջ: Այսպես, 2023 թվականի հուլիսի 6-ին Ադրբեջանը ստեղծեց Ֆրանսիայի գաղութատիրության դեմ պայքարի Բաքվի նախաձեռնող խումբ և կլոր սեղան կազմակերպեց Կալեդոնիայի, Մարտինիկայի և Պոլինեզիայի անկախության կողմնակիցների մասնակցությամբ ։

Հատկապես ցավալի է, որ ֆրանսիացի խորհրդարանականները նպատակահարմար են գտել այցելել Բաքու ադրբեջանական ռեժիմի հրավերով ՝ դատապարտելու "ներկայիս ֆրանսիական գաղութատիրությունը" և սևացնելու մեր երկիրը:

Ադրբեջանը բազմիցս զրպարտչական արշավներ է իրականացրել Հայաստանում գտնվող մեր քաղաքացիների, մասնավորապես ՝ 2021-2023 թվականներին Երևանում դեսպան Անն Լույոյի, նրա իրավահաջորդ Օլիվյե Դըկոտինիի, Հայաստանում ֆրանսիական համալսարանի (UFAR) ռեկտոր Սալվա Նակուզիի, Veolia Armenia-ի գլխավոր տնօրեն Մարիաննա Շահինյանի, ինչպես նաև ֆրանսիացի մի քանի գործարարների դեմ ։

Ադրբեջանական վարչախումբը ճնշումներ է գործադրում մեր երկրի տեղական ինքնակառավարման մարմինների ընտրված պաշտոնյաների վրա ։ Այսպես, անցյալ տարվա ապրիլի 24-ին Ադրբեջանը Բուրգ լե Վալանսի քաղաքապետարանից պահանջել էր քաղաքապետարանի շենքի դիմամասից հանել Լեռնային Ղարաբաղի դրոշը. այն տարածքի, որի բնակչությունը վտարվեց 2023 թվականի սեպտեմբերին Ադրբեջանի զինված ուժերի հարձակման հետևանքով ։

Այս հարձակումներին գումարվում են ֆրանսիական հողում ադրբեջանական ռեժիմի հակառակորդների հանդեպ տեղ գտած սպառնալիքները ։ Ֆրանսիայում ապաստան ստացած ադրբեջանցի բլոգեր Մուհամեդ Միրզալին մեր երկիր ժամանելուց ի վեր երկու մահափորձի թիրախ է դարձել:

Անցած տարվա փետրվարին 92% արդյունքով վերընտրված նախագահ Իլհամ Ալիևի շարժումները մեր երկրի ապակայունացման ռազմավարության արդյունքն են, Մինչդեռ Ֆրանսիան աջակցում է Հայաստանին, որի տարածքային ամբողջականությունն ամեն օր վտանգված է:

Որպես ֆրանսիացի խորհրդարանականներ, Ֆրանսիա-Հայաստան բարեկամության խմբի անդամներ, մենք չենք կարող լռել մեր երկրի դեմ ուղղված այս գործողությունների դեմ: Ադրբեջանի բռնատիրական ռեժիմի միջամտությունը վճռական պատասխան է պահանջում Ֆրանսիայի կողմից, և Բաքվում մեր դեսպանի հետկանչն առաջին ազդանշանն է։

Ուստի կոչ ենք անում Ձեզ ձեռնարկել բոլոր անհրաժեշտ միջոցները ՝ հակազդելու Ադրբեջանի գործողություններին, որոնք կասկածի տակ են դնում Ֆրանսիայի Հանրապետության անբաժանելիությունը»: