396.58
Վրաստանի արդարադատության նախարարն արդյունավետ համարեց հայ-վրացական իրավական համագործակցությունը
2 րոպեի ընթերցում
ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ։ Վրաստանի արդարադատության նախարար Ռատի Բրեգաձեն արդյունավետ է գնահատում հայ-վրացական իրավական համագործակցությունը։
«Արմենպրես»-ի թղթակցի հաղորդմամբ՝ այս մասին Ռատի Բրեգաձեն ասաց ՀՀ արդարադատության նախարար Գրիգոր Մինասյանի հետ համատեղ ասուլիսին։
«Ես կասեմ հետևյալը՝ մեզ համար սա բարիդրացիականության հիմքով, ինտենսիվ ելքի և փորձի վրա կենտրոնացած, գիտելիքի փոխանակման հարաբերություն է, որը շատ արդյունավետ է։ Այս հարաբերություններում գերկարևոր է անձնական ընկերությունը, և ես վստահ եմ, որ նման ցանկացած նախագիծ հաջողակ է լինելու ու օգուտ է բերելու մեր ժողովուրդներին, երկրներին»,-նշեց Վրաստանի արդարադատության նախարարը։
Անդրադառնալով Երևանում մեկնարկած հայ-վրացական 5-րդ իրավական ֆորումին, Բրեգաձեն համոզմունք հայտնեց, որ այն հաջողության պատմություն և արդեն հաստատված ավանդույթ է։
Նրա խոսքով՝ ֆորումին մասնակցում է Հայաստանի և Վրաստանի տարբեր իրավական գերատեսչություններ ընդգրկող իրավաբանների բավականին մեծ խումբ, որը նոր հաջողությունների արձանագրմամբ կնպաստի երկու երկրների հարաբերություններին։
«Ցանկացած պետությունների հարաբերություններում շատ կարևոր է հաստատուն իրավական ավանդույթ ունենալը։ Ես վստահ եմ, որ նմանատիպ ֆորումների շնորհիվ արդարադատության նախարարությունների և ընդհանուր առմամբ արդարադատության ոլորտում համագործակցության հիմքն էլ ավելի կամրապնդվի և մեր մեջ առկա ռազմավարական հարաբերություններն ավելի բարձր մակարդակի կհասնեն»,-ասաց Բերգաձեն։
Բաժանորդագրվեք մեր ալիքին Telegram-ում