Հարկեր-ՀՆԱ ցուցանիշը բարելավվել է 0.8 տոկոսային կետով՝ հասնելով 23.9 տոկոսի. ՊԵԿ նախագահ
2 րոպեի ընթերցում
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Հայաստանում հարկեր-ՀՆԱ (համախառն ներքին արդյունք) ցուցանիշը 2023 թվականին բարելավվել է 0.8 տոկոսային կետով՝ կազմելով 23.9 տոկոս:
«Արմենպրես»-ի հաղորդմամբ՝ այս մասին հայտնեց Պետական եկամուտների կոմիտեի նախագահ Ռուստամ Բադասյանն ԱԺ տնտեսական հարցերի հանձնաժողովի նիստում Հայաստանի Հանրապետության կառավարության ծրագրի (2021-2026 թթ.) 2023 թվականի կատարման ընթացքի և արդյունքների մասին զեկույցի ներկայացման ընթացքում:
«Հարկեր-ՀՆԱ ցուցանիշը բարելավվել է 0.8 տոկոսային կետով: Հարկեր-ՀՆԱ ցուցանիշը 2023-ի համար կազմել է 23.9 տոկոս՝ ներառյալ հիփոթեքի տոկոսագումարների դիմաց եկամտային հարկի վերադարձը»,-ասաց Բադասյանը:
Ըստ նրա՝ հարկային եկամուտները 2023-ի ընթացքում, փաստորեն, ավելի արագ են աճել, քան տնտեսությունն է աճել:
Բադասյանի կարծիքով՝ հարկային վարչարարության ոլորտում այսպիսով գրանցել են հաջողություն ու ստվերի կրճատում: 2023-ին արձանագրվել են 2 տրլն 222 մլրդ դրամ հարկային եկամուտներ, ինչը նախորդ տարվա արդյունքից ավելի է 296 մլրդ դրամով կամ 15.4 տոկոսով, 2021 թվականից՝ 635 մլրդ դրամով կամ 40 տոկոսով, 2020 թվականից ավելի է 837 մլրդ դրամով կամ 60.4 տոկոսով, իսկ 2017 թվականից ավելի է շուրջ 1 տրլն 64 մլրդ դրամով կամ 92 տոկոսով:
Բոլոր հարկատեսակների մասով արձանագրվել է աճ: