2 րոպեի ընթերցում
ԵՐԵՎԱՆ, 29 ՓԵՏՐՎԱՐԻ, ԱՐՄԵՆՊՐԵՍ։ Կոնդ թաղամասն ամբողջությամբ կօտարվի. այն կվերափոխվի, կվերակառուցվի՝ դառնալով էլ ավելի հարմարավետ տուրիստական գոտի, միևնույն ժամանակ կպահպանվի Կոնդի պատմությունն ու կոլորիտը:
«Արմենպրես»-ի հետ զրույցում այս մասին նշեց Երևանի քաղաքապետարանի «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-իտնօրենի ժամանակավոր պաշտոնակատար Արմեն Հարությունյանն՝ ընդգծելով, որ Կոնդ թաղամասի վերակառուցման ծրագրի իրագործման նպատակով ՀՀ Քաղաքաշինության կոմիտեի կողմից հայտարարված երկփուլանի մրցույթի առաջին փուլն ավարտված է. այն արդեն ամփոփվել է՝ կա 7 առաջարկ։
Հարությունյանը նշեց, որ առաջիկայում ծրագրի երկրորդ փուլը նույնպես կհայտարարվի, որից հետո ընտրված 7 առաջարկները կքննարկվեն, դրանցից կառանձնացվեն առավել համապատասխանները։
«Կոնդ թաղամասի նոր հայեցակարգի վերջնական ընտրությունից հետո, բնականաբար, բնակիչները կիրազեկվեն, կլինեն քննարկումներ, հաշվի կառնվեն նաև բնակիչների և հանրության կարծիքը։
Իսկ մինչ այդ բնակիչները սեփականաշնորհման գործընթացը պատշաճ իրականացնելու հնարավորություն ունեն։ Իրավական գործընթացները կօգնեն վերացնել սեփականության հետ կապված վիճահարույց կամ բաց մնացած բոլոր խնդիրները»,-ասաց Հարությունյանը։
Ըստ ճարտարապետաշինարարական վարչության տվյալների՝ այս պահին շենք-շինությունների օրինականացման խնդիր ունեցող մոտ 250 դիմում կա: Դիմումների ներկայացման վերջնաժամկետ դեռևս չկա:
Որքանո՞վ են կոնդեցիները իրազեկված և ի՞նչ ակնկալիքներ ունեն սպասվող փոփոխություններից։
Մանրամասները՝ տեսանյութում։
Հեղինակ՝ Գայանե Գաբոյան
Օպերատոր՝ Հայկ Բարսեղյան