Պատկան մարմինները հերքում են Վարդենիսի նյարդահոգեբանական տուն-ինտերնատի և կադաստրի գրասենյակի փակվելու լուրերը
1 րոպեի ընթերցում
ԵՐԵՎԱՆ, 6 ՓԵՏՐՎԱՐԻ, ԱՐՄԵՆՊՐԵՍ։ Հայաստանի պետական մարմինները հերքում են Վարդենիսի նյարդահոգեբակաան տուն-ինտերնատի, ինչպես նաև կադաստրի կոմիտեի Վարդենիսի բաժանմունքի փակվելու մասին խոսակցությունները։
Հայաստանի աշխատանքի և սոցիալական հարցերի նախարարությունը, անդրադառնալով խոսակցություններին, թե Վարդենիսի նյարդահոգեբանական տուն-ինտերնատը նախատեսում են փակել, հերքել է դրանք․ «Նման որևէ քննարկում չի եղել և չկա»,- «Արմենպրես»-ին ասել են աշխատանքի և սոցիալական հարցերի նախարարությունից։
Կադաստրի կոմիտեն իր հերթին հերքել է շրջանառվող խոսակցությունները Կադաստրի կոմիտեի Վարդենիսի գրասենյակի փակվելու մասին․
«Տեղեկացնում ենք, որ Կադաստրի կոմիտեի «Վարդենիս» սպասարկման գրասենյակի պետ Գրիշա Աղաջանյանը մինչև սույն թվականի փետրվարի 28-ը գտնվում է արձակուրդում, իսկ գրասենյակը շարունակում է իր բնականոն աշխատանքը»,- ասված է Կադաստրի կոմիտեի պարզաբանման մեջ:
Վարդենիսի նյարդահոգեբանական տուն-ինտերնատի և Կադաստրի կոմիտեի Վարդենիսի գրասենյակի փակվելու մասին խոսակցություններն ակտիվորեն շրջանառվում են սոցիալական ցանցերում։