ՀՀ ՆԳՆ-ի և Եվրոպոլի միջև տեղեկատվության փոխանակումը կդառնա առավել օպերատիվ ու անվտանգ․ նախագիծ
2 րոպեի ընթերցում
ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ։ Հայաստանը մտադիր է ընդլայնել Եվրոպական Միության հետ համագործակցությունը իրավապահ ոլորտում։
Ինչպես տեղեկացնում է «Արմենպրես»-ը, նախագիծը ներառված է կառավարության հունվարի 25-ի հերթական նիստի օրակարգում։
Նշվում է, որ 2021թ. սեպտեմբերի 28-ին Եվրոպոլի գործադիր տնօրեն Քեթրին դը Բոլի և ՀՀ ոստիկանության պետ, ոստիկանության գեներալ-մայոր Վահե Ղազարյանի կողմից ստորագրվել է «Հայաստանի Հանրապետության իրավապահ մարմինների և Եվրոպական միության իրավապահ ոլորտում համագործակցության գործակալության միջև համագործակցության հաստատման վերաբերյալ» աշխատանքային համաձայնագիրը, որը նպատակ ունի ընդլայնել համագործակցությունը անդրազգային հանցավորության դեմ պայքարում։
«Հայաստանի Հանրապետության ներքին գործերի նախարարության եւ Եվրոպական միության իրավապահ ոլորտում համագործակցության գործակալության միջև» փոխգործակցության մասին համաձայնագիրը և «Հայաստանի Հանրապետության ներքին գործերի նախարարության և Եվրոպական միության իրավապահ ոլորտում համագործակցության գործակալության միջև անվտանգ կապուղու մասին» փոխըմբռնման հուշագիրը բխում են վերոնշյալ աշխատանքային համաձայնագրից:
«Փոխգործակցության մասին համաձայնագիրը հիմք կհանդիսանա ՀՀ ՆԳՆ-ից կապի սպայի Եվրոպոլ տեղակայման համար, ինչի շնորհիվ Եվրոպոլի հետ համագործակցությունը և տեղեկատվության փոխանակումը կդառնա առավել օպերատիվ:
Փոխըմբռնման հուշագիրը իրավական հիմք կհանդիսանա Եվրոպոլի կողմից ՀՀ ՆԳՆ-ում համապատասխան սարքավորումների տեղադրմամբ տեղեկատվության փոխանակման համար անվտանգ կապուղու ստեղծման համար:
Ելնելով վերոգրյալից ՀՀ ներքին գործերի նախարարությունը սույն միջազգային պայմանագրերի ստորագրումը գտնում է նպատակահարմար»,- նշված է նախագծի հիմնավորման մեջ։