ՀՀ ԱԽ քարտուղարը գրառում է կատարել Իրանի դեսպանատանը բացված սգո մատյանում

ԵՐԵՎԱՆ, 5 ՀՈւՆՎԱՐԻ, ԱՐՄԵՆՊՐԵՍ: ՀՀ Անվտանգության խորհրդի քարտուղար Արմեն Գրիգորյանն այցելել է ՀՀ-ում Իրանի Իսլամական Հանրապետության դեսպանատուն և ցավակցական գրառում կատարել սգո մատյանում՝ շուտափույթ ապաքինում մաղթելով Քերմանում ահաբեկչության հետևանքով տուժածներին։

«Արմենպրես»-ի հաղորդմամբ՝ ինչպես փոխանցում է «Sputnik Արմենիա»-ն, լրագրողների հետ զրույցում Անվտանգության խորհրդի քարտուղար Արմեն Գրիգորյանն ասել է, որ Հայաստանը կապի մեջ է Իրանի Իսլամական Հանրապետության հետ՝ հասկանալու, թե ինչպիսի օգնություն կարող է տրամադրել բարեկամ երկրին։

«Հայաստանի Հանրապետությունը դատապարտում է ահաբեկչության յուրաքանչյուր դրևսորում, պատրաստ է Իրանի Իսլամական Հանրապետությանը՝ կառավարությանն ու ժողովրդին օգնել հաղթահարելու այս ծանր վիճակը»,- ասել է Գրիգորյանը։

Մանրամասները` սկզբնաղբյուր նյութում։

Իրանի Քերման քաղաքում 2 պայթյունները տեղի են ունեցել հունվարի 3-ին՝ 2020 թվականին Բաղդադում ԱՄՆ ավիահարվածի հետևանքով Իրանի Իսլամական հեղափոխության պահապանների կորպուսի (ԻՀՊԿ) «Ղոդս» հատուկ ստորաբաժանման ղեկավար, իրանական առանցքային զորահրամանատարներից գեներալ-լեյտենանտ Ղասեմ Սոլեյմանիի մահվան 4-րդ տարելիցի օրը, նրա հիշատակին նվիրված արարողության ժամանակ։ Իրանի ներքին գործերի նախարարության տվյալներով պայթյունների հետևանքով զոհվել է 88 մարդ։

Լուսանկարը` «Sputnik Արմենիա»-ի