ԱՄԷ-ի WAM գործակալությունը շնորհավորել է «Արմենպրես»-ի հիմնադրման 105-ամյակի առթիվ

ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ։ Արաբական Միացյալ Էմիրությունների պետական WAM գործակալությունը շնորհավորել է «Արմենպրես» լրատվական գործակալությանը՝ հիմնադրման 105-ամյակի առթիվ։

«Արաբական Միացյալ Էմիրությունների WAM լրատվական գործակալությունն իր ամենաանկեղծ շնորհավորանքներն է փոխանցում «Արմենպրես» գործակալության 105-ամյակի առթիվ։ Ցանկանում ենք մեր շնորհավորանքներն ուղղել ձեր լրատվական կազմակերպության ղեկավարությանը և աշխատակիցներին, ինչպես նաև բոլոր պատասխանատուներին՝ ակնկալիքով, որ այս կարևոր իրադարձությունը կծառայի որպես ոգեշնչման և մոտիվացիայի աղբյուր, որի արդյունքը կլինի մեդիա դաշտում նորարարության և նվաճումների ավելացումը: Բացի այդ, ցանկանում ենք ընդգծել մեր ոգևորությունը՝ շարունակելու համագործակցել ձեր հարգարժան մեդիա կազմակերպության հետ՝ այս յուրօրինակ հարաբերությունները հասցնելու ամենաբարձր մակարդակի և իրականացնելու մեր ընդհանուր մեդիա նպատակները», - ասված է գործակալության տնօրեն Մոհամեդ Ջալալ ալ Ռաիսիի ուղերձում:

«Արմենպրես»-ը դեկտեմբերի 18-ին տոնում էր իր հիմնադրման 105-ամյակը, որի առթիվ գործակալությունը ներկայացրել էր «Դարի վավերագրություն» ցուցահանդեսը՝ մեկ հարկի տակ համախմբելով և՛ պաշտոնյաների, և՛ հասարակական, քաղաքական գործիչների, և՛ մշակույթի ոլորտի ներկայացուցիչների: