Ֆիլհարմոնիկը ֆլեշմոբ է իրականացրել Դալմա գարդեն մոլում
2 րոպեի ընթերցում
![Ֆիլհարմոնիկը ֆլեշմոբ է իրականացրել Դալմա գարդեն մոլում](http://armenpress.am/resized/480/static/news/b/2023/11/1125093.jpg)
ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի ազգային ֆիլհարմոնիկ նվագախումբը, Էդուարդ Թոփչյանի ղեկավարությամբ, նոյեմբերի 26-ին իրականացրել է ֆլեշմոբ` Դալմա գարդեն մոլում նվագելով Մորիս Ռավելի հայտնի «Բոլեռո»-ն։
«Արմենպրես»-ի փոխանցմամբ՝ ազգային ֆիլհարմոնիկի՝ մոտ 80 երաժիշտ, անսպասելի դուրս գալով մոլի տարբեր խանութներից, հավաքվել են առաջին հարկի սրահում ու մաեստրո Թոփչյանի ձեռքի մի շարժումով «Բոլեռո»-ի կրակոտ, իսպանական ռիթմերը տարածվել են ամբողջ մոլով մեկ` հիացմունք ու զարմանք պատճառելով այցելուներին։
Ֆլեշմոբն անսպասելի նախատոնական անակնկալ էր երևանցիներին և դասական երաժշտության տարածման գեղեցիկ ակցիա` ազգային ֆիլհարմոնիկի և Դալմա գարդեն Մոլի կողմից։
Իսկ դրա համար ընտրված ստեղծագործությունը` Ռավելի «Բոլեռո»-ն, նվագախմբային երկացանկի ամենասիրված ու տարածում գտած գործերից մեկն է: Այն հնչում է ֆիլմերում, թատերական ներկայացումներում, բալետային բեմադրություններում։ 1979թ-ին, հնչելով ամերիկյան ռոմանտիկ-կատակերգական «10» ֆիլմում, աննախադեպ տարածում գտավ։ Մասսայական վաճառքը 1 միլիոն դոլարի հոնորար բերեց և կայծակնային կերպով Ռավելին դարձրեց ամենավաճառվող դասական կոմպոզիտորը։
«Բոլեռո»-ն Ռավելը գրել է 1928թ-ին, այն առաջին անգամ կատարվել է 1928թ.-ի նոյեմբերի 22-ին` Փարիզի «Գարնիե» օպերայում։