Պատգամավորը ՄԱԿ-ի հատուկ զեկուցողին ներկայացրել է դատաիրավական համակարգում իրականացված օրենսդրական բարեփոխումները
2 րոպեի ընթերցում
ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Հայաստանի ազգային ժողովի աշխատանքի եւ սոցիալական հարցերի մշտական հանձնաժողովի նախագահ Հերիքնազ Տիգրանյանը հանդիպել է Ճշմարտության, արդարության, հատուցման եւ չկրկնվելու երաշխիքների խթանման հարցերով ՄԱԿ-ի հատուկ զեկուցող Ֆաբիան Սալվիոլիի գլխավորած պատվիրակության հետ:
«Արմենպրես»-ի հաղորդմամբ՝ ինչպես տեղեկացնում են Ազգային ժողովից՝ Տիգրանյանը հանդիպմանը բարձր է գնահատել ՄԱԿ-ի հատուկ զեկուցողի մանդատի կարեւորությունը եւ մարտահրավերներով լի այս ժամանակաշրջանում Հայաստան այցելելու առաքելությունը:
Հանդիպումը տեղի է ունեցել նոյեմբերի 23-ին, որին մասնակցել է Մարդու իրավունքների պաշտպանության եւ հանրային հարցերի մշտական հանձնաժողովի անդամ Մարինա Ղազարյանը:
Աշխատանքային այցի շրջանակում ՄԱԿ-ի հատուկ զեկուցողը՝ որպես անկախ փորձագետ, տարբեր գերատեսչությունների հետ հանդիպումների ընթացքում փորձում է վեր հանել անկախացումից հետո Հայաստանում տեղի ունեցող իրադարձությունները, որոնք վերաբերում են մարդու իրավունքների պաշտպանությանը, վնասի հատուցման ինստիտուտին եւ անցումային արդարադատությանը:
Հերիքնազ Տիգրանյանը ներկայացրել է դատաիրավական համակարգում, մարդու իրավունքների պաշտպանության ոլորտում իրականացած օրենսդրական բարեփոխումները: Մանրամասն քննարկվել են զինծառայողների սոցիալական երաշխիքների եւ փոխհատուցման մեխանիզմների շուրջ կատարվող աշխատանքները:
Հանձնաժողովի նախագահն ընդգծել է, որ զինծառայողների եւ նրանց ընտանիքի անդամների սոցիալական պաշտպանության հարցերը մշտապես օրենսդիր եւ գործադիր մարմինների ուշադրության կենտրոնում են: