Հիասթափեցնող էր Ադրբեջանի հրաժարվելը Գրանադայի հանդիպմանը մասնակցելուց. Բունդեսթագի պատգամավոր

ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Գերմանիայի Բունդեսթագի արտաքին հարաբերությունների հանձնաժողովի նախագահ Միխայել Ռոթը հիասթափեցնող է համարում Գրանադայում նախատեսված հնգակողմ հանդիպմանը Ադրբեջանի նախագահի՝ մասնակցությունից հրաժարվելը:

Ռոթն այս մասին ասաց Հայաստանում Գերմանիայի դեսպանությունում հրավիրված ասուլիսում՝ պատասխանելով «Արմենպրես»-ի՝ Արևմուտքի միջնորդությամբ բանակցություններին մասնակցությունից Ադրբեջանի հրաժարվելու վերաբերյալ հարցին:

Ռոթը նախ ողջունեց, որ Գերմանիայի կանցլերը, նաև՝ Ֆրանսիայի նախագահը մեծապես աջակցում են Եվրամիության, Եվրոպական խորհրդի նախագահ Շառլ Միշելի ջանքերը՝ այս ձևաչափով բանակցությունները շարունակելուն:

«Բնականաբար, ողջունելի էր Հայաստանի վարչապետի մասնակցությունը Գրանադայի հանդիպմանը: Նույնքան հիասթափեցնող էր Ադրբեջանի հրաժարվելն այս ձևաչափին մասնակցելուց: Այն, ինչ պետք է անենք մոտակա օրերին, համոզելն է ադրբեջանական կողմին, որ նաև իր շահերից է բխում վերադառնալ բանակցությունների սեղանին, և, որ իր բառերը նա կարողանա իսկապես վերածել գործողությունների»,-ասաց Բունդեսթագի պատգմավորը:

Գրանադայում հոկտեմբերի 5-ին կայացել է Հայաստանի վարչապետ Նիկոլ Փաշինյանի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի եւ Եվրոպական խորհրդի նախագահ Շառլ Միշելի քառակողմ հանդիպումը: Կայացած քառակողմ հանդիպումից հետո կողմերը հանդես են եկել համատեղ հայտարարությամբ: Նախատեսված էր, որ հանդիպումը պետք է կայանա հնգակողմ ձևաչափով: Սակայն հոկտեմբերի 4-ին ադրբեջանական լրատվամիջոցները հայտնեցին, որ Ադրբեջանի նախագահ Իլհամ Ալիևը հրաժարվել է Գրանադայում հոկտեմբերի 5-ին նախատեսված հնգակողմ հանդիպումից։ Որպես պատճառ նշվում էր այն հանգամանքը, որ Ֆրանսիան և Գերմանիան մերժել էին Ադրբեջանի առաջարկը հանդիպմանը Թուրքիայի նախագահ Ռեջեփ Թայիփ Էրդողանի մասնակցության վերաբերյալ։ Նաև նշվում էր, որ Ադրբեջանը մերժելու է հանդիպման առաջարկներն այն ձևաչափերով, որոնց կմասնակցի Ֆրանսիան։ Միևնույն ժամանակ նշվում էր, որ Ադրբեջանը պատրաստ է վերսկսել ԵՄ-ի միջնորդությամբ Հայաստանի վարչապետի հետ եռակողմ հանդիպումների ձևաչափը։