Վագիֆ Խաչատրյանի նկատմամբ Բաքվում իրականացվում է շինծու դատավարություն․ ՀՀ ԱԳՆ մամուլի խոսնակ
2 րոպեի ընթերցում
ԵՐԵՎԱՆ, 13 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի արտաքին գործերի նախարարի մամուլի խոսնակ Անի Բադալյանը շեշտում է՝ Լեռնային Ղարաբաղի 68-ամյա բնակիչ Վագիֆ Խաչատրյանի նկատմամբ Բաքվում իրականացվում է շինծու դատավարություն։
«Արմենպրես»-ի տեղեկացմամբ՝ Անի Բադալյանը Ադրբեջանի մայրաքաղաքում տեղի ունեցող գործընթացը X սոցիալական ցանցի հարթակում կատարած գրառմամբ համարել է բոլոր նորմերի լիակատար անտեսման ցուցադրում։
«Ապօրինի առևանգմանը, որը միջազգային մարդասիրական օրենքի կոպտագույն խախտում է, այժմ հաջորդում է 68-ամյա քաղաքացիական անձի տառապանքը ցուցադրող տեսանյութերի և լուսանկարների հրապարակումը։ Ինչպես պահանջել են բազմաթիվ միջազգային իրավապաշտպան կազմակերպություններ և հաստատություններ, Բաքվում դեռևս պատանդ պահվող ռազմագերիներն ու քաղաքացիական անձինք պետք է ազատ արձակվեն»,- գրել է Բադալյանը։
2/2 Illegal abduction,in flagrant violation of IHL, is now followed by publication of videos & photos showing suffering of 68-year-old civilian.
As requested by numerous int’l human rights orgs & institutions, ARM POWs & civilians still kept hostage in Baku should be released. pic.twitter.com/CWXX83ILJp
— Ani Badalyan, Spokesperson of MFA of Armenia (@ArmSpoxMFA) October 13, 2023
Անհետաձգելի բուժօգնություն ստանալու համար Լեռնային Ղարաբաղից «Կարմիր Խաչի» միջոցով Հայաստան տեղափոխվող Վագիֆ Խաչատրյանին Ադրբեջանի սահմանապահ ծառայության աշխատակիցները առևանգել և Բաքու են տեղափոխել 2023թ. հուլիսի 29–ին։ Ադրբեջանի դատախազությունը նրան մի շարք շինծու մեղադրանքներ է առաջադրել։ Հոկտեմբերի 13-ին Բաքվում կայացել է Վագիֆ Խաչատրյանի «գործով» նախադատավարական նիստ։