ԵՊՀ արևելագիտության ֆակուլտետում բացվեց Սիրիայի Արաբական Հանրապետության լսարան
3 րոպեի ընթերցում
ԵՐԵՎԱՆ, 5 ՍԵՊՏԵՄԲԵՐԻ, ԱՐՄԵՆՊՐԵՍ: ԵՊՀ արևելագիտության ֆակուլտետում բացվեց Սիրիայի Արաբական Հանրապետության լսարան, որտեղ ուսանողները հնարավորություն կունենան Սիրայի մշակույթին խորությամբ ծանոթանալու: «Արմենպրես»-ի հաղորդմամբ՝ Հայաստանում Սիրիայի դեսպանությունը Սիրայի մշակույթի նախարարության աջակցությամբ մոտ 100 գիրք նվիրեց լսարանին:
Հայաստանում Սիրիայի դեսպան Նորա Արիսյանը կարևորեց նման լսարանի բացումը: Նրա համոզմամբ սա կարևոր համագործակցության դրսևորում է Սիրիայի և Հայաստանի միջև:
«Մեր կարծիքով լսարանը պետք է դառնա կարևոր հարթակ կրթական, լեզվական, մշակութային հարաբերությունները ավելի զարգացնելու համար»,- նշեց դեսպանը:
Արիսյանը ընդգծեց՝ լսարանը ոչ միայն ուսանողների, նաև դասախոսների համար անհրաժեշտ հարթակ է լինելու:
«Այստեղ դասախոսություններն անցկացվելու են ինտերակտիվ ձևաչափով: Կլինեն նաև օնլայն դասեր, որոնք կանցկացնեն Սիրայի մեր մասնագետները՝ լեզվաբանները, պատմաբանները, գրողները և այլն: Սա կարող է նաև հարթակ լինել դասախոսների համար՝ ավելի լավ ճանաչելու Սիրայի մշակույթը և պատմությունը:
Բուհի ռեկտոր Հովհաննես Հովհաննիսյանը նշեց՝ ԵՊՀ-ում տարբեր ազգերի մշակույթը, լեզուն և պատմությունը ներկայացնելու ավանդույթ կա:
«Մենք սովորեցնում ենք երկրագիտություն, որպեսզի ուսանողն ավարտելուց հետո կարողանա ամբողջական պատկերացում կազմել տվյալ երկրի մշակույթի մասին, և լսարանների բացումը այդ համատեքստում ենք դիտարկում»,- նշեց ռեկտորը: Նրա խոսքով լսարանի բացումը երկու երկրների դարավոր բարեկամության վկայությունն է:
ԵՊՀ Արևելագիտության ֆակուլտետի դեկան Ռուբեն Մելքոնյանը նշեց՝ արևելագիտության ֆակուլտետի հիմնադրումից ի վեր Սիրիան դե ֆակտո ներկա է եղել, ի դեմս նոր լսարանի Սիրիան այսուհետ դե յուրե ներկա է արևելագիտւթյան ֆակուլտետում:
«Աշխարհում հայ-սիրիական հարաբերությունները օրինակելի են, և այդ բարի կամեցողությունը սկսում է ուսանողական նստարանից: Վստահ եմ, որ այս լսարանից դուրս են գալու նոր դեսպաններ, նոր մասնագետներ, որոնք շարունակելու են ամրապնդել հայ-սիրական հարաբերությունները»,- նշեց Մելքոնյանը:
Լսարանն առաջիկայում կհամալրվի գերժամանակակից smartboard-ով, որը կլինի համալսարանի ներդրումը սրահի կայացման գործում: