2 րոպեի ընթերցում
ՍՈՉԻ, 21 ՆՈՅԵՄԲԵՐԻ, ԱՐՄԵՆՊՐԵՍ: Ռուսաստանի Սոչի քաղաքում մեկնարկել է ատոմային ոլորտի ամենախոշոր իրադարձություններից մեկը՝ «Ատոմէքսպո» 12-րդ միջազգային համաժողովը:
Ինչպես Սոչիից հայտնում է«Արմենպրես»-ի թղթակիցը, այս տարի երկօրյա (նոյեմբերի 21-22) համաժողովին մասնակցում է 74 երկրից ավելի քան 4100 մասնակից: Մասնակցում է նաև Հայաստանի պատվիրակությունը: Ներկա էՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանը:
Համաժողովը կազմակերպվում է «Ռոսատոմ» պետական կորպորացիայի նախաձեռնությամբ: «Ատոմէքսպո»-ն խոշորագույն ցուցահանդեսային և գործարար հարթակ է, որում քննարկվում են ատոմային ոլորտի ներկա վիճակը և հետագա զարգացման միտումները: Համաժողովն անցկացվում է 2009 թվականից: «Ատոմէքսպո»-ին մասնակցում են ոլորտի խոշորագույն, առանցքային կազմակերպություններ, պետական կառույցներ, միջազգային կազմակերպություններ և առաջատար փորձագետներ:
Երկօրյա ֆորումի շրջանակում կանցկացվեն լիագումար նիստեր, կլոր սեղան-քննարկումներ: Ֆորումն ուղեկցվում է նաև ցուցահանդեսով, որում ոլորտի ընկերությունները ներկայացնում են իրենց առաջարկած տեխնոլոգիական լուծումները:
Երկօրյա համաժողովի առաջին օրը նախատեսված են կլոր սեղան-քննարկումներ ««Կանաչ» էներգիայի անցման համար լուծումների դիվերսիֆիկացիա», «Միջուկային և ճառագայթային տեխնոլոգիաների ոչ էներգետիկ կիրառություններ», «Արհեստականբանականության կիրառումն արդյունաբերության և ատոմային ոլորտի մեջ» և այլ խորագրերով:
Իսկ լիագումար նիստը կրում է ««Միջուկային գարուն». ստեղծելով կայուն ապագա» խորագիրը:
Համաժողովի շրջանակում կներկայացվի նաև Օլիվեր Սթոունի Nuclear ֆիլմը: