Վարչապետն արդիական է համարում ԵԱՏՄ-ի ներքին շուկայում խոչընդոտների վերացման հարցը

ԵՐԵՎԱՆ, 21 ՀՈԿՏԵՄԲԵՐԻ, ԱՐՄԵՆՊՐԵՍ։ Ժամանակակից իրողություններում ԵԱՏՄ-ի ներքին շուկայում առկա խոչընդոտների վերացման հարցը հենց ներքին շուկայի կայունության համար է, որը չի կորցնում իր արդիականությունը։ Ինչպես տեղեկացնում է«Արմենպրես»-ը, Երևանում տեղի ունեցող Եվրասիական միջկառավարական խորհրդի նիստի լայն կազմով հանդիպմանը այս մասին ասաց ՀՀ վարչապետ Նիկոլ Փաշինյանը։

«ԵԱՏՄ ընդհանուր շուկայի կողմից տրամադրվող բոլոր հնարավորությունների պարագայում անդամ պետությունները պահպանում են ազգային օրենսդրությունների առանձնահատկություններն ու պահանջները և, անհրաժեշտության դեպքում, ի պատասխան նոր մարտահրավերների՝ կիրառում են պաշտպանողական միջոցներ իրենց ներքին շուկաների համար։ Միաժամանակ, ինտեգրման առանցքային գաղափարի և սկզբունքի ապահովման, ԵԱՏՄ ազատ տարածության չորս սկզբունքների լիարժեք իրականացման ճանապարհին մենք հետևողականորեն և նպատակաուղղված առաջ ենք շարժվում արգելքների վերացման ուղղությամբ»,- ասաց Փաշինյանը։

Վարչապետն ընդգծեց, որ ժամանակակից իրողություններում խոչընդոտների վերացման հարցը ներքին շուկայի կայունության համար է, որը չի կորցնում իր արդիականությունը։ «Սա շարունակական գործընթաց է, որի արդյունավետությունն ու օպերատիվությունը մեծապես կախված է Միության անդամ պետությունների և մարմինների համակարգված աշխատանքից, ինչպես նաև փոխզիջումային լուծում գտնելու պատրաստակամությունից»,- եզրափակեց Փաշինյանը։