Աշխատանք ենք տանում, որ նոր, ավելի ցածր վարձավճարներով բնակարաններ, սենյակներ մտցնենք շուկա. Քերոբյան
1 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ էկոնոմիկայի նախարար Վահան Քերոբյանն անդրադարձել է Հայաստանում, հատկապես Ռուսաստանի քաղաքացիների մեծ հոսքով պայմանավորված, բնակարանների վաճառքի և վարձակալության բարձր գներին:
«Արմենպրես»-ի հաղորդմամբ՝Քերոբյանը խորհրդարանում լրագրողների հետ ճեպազրույցում ասաց. «Հենց նոր իմ ընկերը, որ մի քանի օրով պետք է Հայաստան գա, ասաց, որ 500 եվրոյից պակաս չի կարողանում գիշերավարձով հյուրանոց գտնել»:
Նախարարը նկատեց, որ հիմա նախկինի նման հարմար գներով բնակարաններ հնարավոր չէ վարձել:
«Մենք հիմա մեծ աշխատանք ենք տանում, որ կարողանանք նոր, ավելի ցածր վարձավճարներով բնակարաններ կամ սենյակներ մտցնենք շուկա: Այդ առումով աշխատում ենք թե մասնավոր ընկերությունների հետ, թե ներսում փորձում ենք ստեղծել այնպիսի ծրագիր, որը կօգնի դա անել»,-ասաց Քերոբյանը:
Նրա խոսքով՝ տարվա սկզբին Երևանում մոտ 7 հազար բնակարան, որ դատարկ էր, հիմա շրջանառության մեջ է, այսինքն՝ այնտեղ բնակվողներ կան: Նախարարի խոսքով՝ այդ առումով շարունակում են աշխատանքը, որ երկրորդային շուկայից ավելի շատ բնակարաններ մտնեն շրջանառության մեջ: Քերոբյանը հավելեց, որ հաշվի են առնում մարդկանց այն քանակը, որ ամեն օր գալիս է Հայաստան: