Քոչարյանի պաշտպանները հետ են վերցրել ՍԴ-ին ներկայացրած դիմումները

ԵՐԵՎԱՆ, 25 ՀՈՒՆԻՍԻ, ԱՐՄԵՆՊՐԵՍ։ ՀՀ երկրորդ նախագահ Ռոբերտ Քոչարյանի պաշտպանական խումբը հետ է վերցրել Սահմանադրական դատարանին ներկայացված դիմումները։ Ինչպես տեղեկացնում է «Արմենպրես»-ը, այս մասին լրագրողների հետ զրույցում ասաց պաշտպան Արամ Օրբելյանը։ Նա նշեց, որ պատճառը ԱԺ-ի «Իմ քայլ»-ը խմբակցության կողմից Սահմանադրությունում փոփոխություններ կատարելու փաթեթի ընդունումն է։

«Պարոն Քոչարյանի հետ այսօր առավոտյան վերջնական քննարկել ենք և որոշում ենք ընդունել հրաժարվել մեր ներկայացրած դիմումներից։ Որոշում կայացրեցինք հետ վերցնել մեր ներկայացրած երկու դիմումները։ Հիմա Արամ Վարդևանյանը դիմում է ներկայացնում, համապատասխան որի, խնդրում ենք ՍԴ-ին, հիմք ընդունելով Սահմանադրական դատարանի մասին համապատասխան հոդվածը, հետ վերցնել մեր ներկայացրած երկու դիմումները։ Այսինքն՝ այն դիմումները, որոնք վերաբերում էին 300․1 հոդվածի համապատասխանությանը Սահմանադրության 72, 73, 78, 79 հոդվածներին»,- ասաց Օրբելյանը։

Օրբելյանի խոսքով՝ Ռոբերտ Քոչարյանը հստակ դիրքոշորում է հայտնել, որ եթե իր գործի պատճառով պառլամենտարիզմի կայացման որոշակի խոչընդոտներ պետք է առաջանան, ապա ինքը հետ կվերցնի դիմումները։

«Մեր ընդհանուր պահանջը, հորդորն ու խնդրանքն է բոլոր քաղաքական ուժերին Սահմանադրության հետ կապված գործընթացներում ոչ պարոն Քոչարյանի, ոչ փաստաբանների անունը չշոշափել։ Այս գործընթացը բացառապես դիտարկել պառլամենտական ֆրանկցիաների և պատգամավորների իրավասության շրջանակներում։ Եթե գտնում են, որ իրավունքի խախտում կա, ինչի մասին արտահայտել են, չսպասեն այդ ամսաթվին, հիմք ընդունելով այս դիմումը, միանան այդ գործընթացին»,- եզրափակեց Օրբելյանը։

Հուլիսի 7-ին Սահմանադրական դատարանը պետք է քններ ՀՀ քրեական օրենսգրքի 300․1-ին հոդվածի՝ Սահմանադրությանը համապատասխանության հարցը որոշելու վերաբերյալ ՀՀ երկրորդ նախագահ Ռոբերտ Քոչարյանի դիմումը։