ԵՐԵՎԱՆ, 17 ՀՈՒՆԻՍԻ, ԱՐՄԵՆՊՐԵՍ։ ՀՀ ազգային անվտանգության ծառայության շենքի դիմաց լրագրողների մասնագիտական աշխատանքի ժամանակ ոստիկանների հետ տեղի ունեցած միջադեպի հետ կապված հարցը Մարդու իրավունքների պաշտպան Արման Թաթոյանի անմիջական ուշադրության ներքո է։
«Արմենպրես»-ի հաղորդմամբ՝ այս մասին Թաթոյանը գրել է «Ֆեյսբուք»-ի իր էջում և նշել, որ հունիսի 14-ից սկսած մինչև հունիսի 16-ի ուշ երեկոյան Մարդու իրավունքների պաշտպանի աշխատակազմը գործել է գերբեռնված ռեժիմով։
«Այս պահին ուզում եմ 3 հարցի վերաբերյալ պարզաբանում անել՝ լրագրողների մասնագիտական աշխատանքի հետ կապված հարցերն իմ անմիջական ուշադրության ներքո են։ Ոստիկանության հետ միջադեպի տեսանյութերը մանրամասն կուսումնասիրենք և ըստ ուսումնասիրության արդյունքների՝ կորոշենք միջոցների հարցը։ Կաշխատենք նաև լրագրողների հետ անհատապես»,- նշել է ՄԻՊ-ը։
Ազգային ժողովի շենքի մոտից բերման ենթարկված ըմբշամարտիկ Ռոման Ամոյանի վերաբերյալ Թաթոյանն հայտնել է, որ իր իսկ նախաձեռնությամբ արդեն խոսել է մարզիկի հետ։ Մարդու իրավունքների պաշտպանը գրել է, որ իրենց մոտ այդ հարցով նախաձեռնված է առանձին վարույթ։
Հունիսի 16-ի ուշ երեկոյան ՄԻՊ աշխատակազմի 1 խումբ աշխատել է նաև Ոստիկանության բաժիններից մեկում՝ համաձայն ստացած ահազանգի։
Ազգային ժողովը հունիսի 16-ին քննարկել և անձեռնմխելիություն զրկել է ԱԺ «Բարգավաճ Հայաստան» խմբակցության ղեկավար Գագիկ Ծառուկյանին։
Ազգային ժողովի, իսկ ավելի ուշ նաև Ազգային անվտանգության ծառայության շենքերի մոտ հունիսի 16-ին հավաքվել էին Գագիկ Ծառուկյանի աջակիցները, ովքեր պահանջում էին դադարեցնել Ծառուկյանի նկատմամբ քրեական հետապնդումը։
Արդյունքում ոստիկանության տարբեր բաժիններ բերման է ենթարկվել 150-ից ավելի քաղաքացի։