Փոխոստիկանապետը ներկայացրեց ոստիկանությունում կորոնավիրուսից պաշտպանվելու համար իրականացվող քայլերը

ԵՐԵՎԱՆ, 23 ՄԱՐՏԻ, ԱՐՄԵՆՊՐԵՍ: ՀՀ ոստիկանության պետի տեղակալ Հայկ Մհրյանը ներկայացրեց, թե ոստիկանությունում ինչ միջոցներ են ձեռնարկվում կորոնավիրուսից պաշտպանվելու համար: «Արմենպրես»-ի փոխանցմամբ՝ այս հարցին Մհրյանն անդրադարձավ մարտի 23-ին հրավիրված մամուլի ասուլիսի ընթացքում:

«Ախտահանումը ոչ միայն ոստիկանության մեքենաների, այլև օրենքով սահմանված կարգով ոստիկանության բոլոր վայրերում իրականացվում է, իսկ կարգը և ձևը որոշվել է մասնագետների միջոցով»,- ասաց Մհրյանը:

Փոխոստիկանապետը նշեց, որ ոստիկանության բուժվարչության կողմից նաև անհրաժեշտ քանակով անձնական պաշտպանիչ միջոցներ են տրամադրվում ոստիկանության աշխատակիցներին:

ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն:

Հայաստանում կորոնավիրուսի հաստատված դեպքերի թիվը 194 է: Առաջին դեպքը գրանցվել էր մարտի 1-ին: Քաղաքացին Հայաստան էր եկել Իրանից: Նա ապաքինվել է և դուրս է գրվել: Մարտի 21-ին արձանագրվել է ապաքինման երկրորդ դեպքը։ Կորոնավիրուսի տարածման առաջնակի դեպքերից մեկն արձանագրվել է Էջմիածնում, մյուսը՝ Շենգավիթում՝ արտադրամասում. երկու դեպքում էլ վարակակիրը եկել էր Իտալիայից։