2 րոպեի ընթերցում
ԵՐԵՎԱՆ, 16 ՄԱՐՏԻ, ԱՐՄԵՆՊՐԵՍ: ՀՀ կառավարությունում կհրավիրվի խորհրդակցություն և կքննարկվի Հայաստանում կամ հանրապետության առանձին հատվածներում արտակարգ դրություն հայտարարելու հարցը: «Արմենպրես»-ի փոխանցմամբ՝ այս մասին «Ֆեյսբուք»-ի իր էջում ուղիղ եթերի ընթացքում հայտարարեց ՀՀ վարչապետ Նիկոլ Փաշինյանը:
«Այսօր կարևոր հարցեր պետք է քննարկենք ու կարևոր որոշումներ կայացնենք: Առկա իրավիճակը վերլուծելով, մասնավորապես, պետք է պատասխանենք հարցին, թե արդյոք կարիք կա Հայաստանում կամ մեր հանրապետության առանձին հատվածներում կորոնավիրուսի հետ կապված արտակարգ դրություն հայտարարելու, թե ոչ: Կկայացնենք մաքսիմալ արդյունավետ որոշում և կտեղեկացնենք բոլորին»,- ասաց Փաշինյանը:
ՀՀ վարչապետը նշեց, որ արտակարգ դրություն հայտարարելով, ընդամենը համաճարակային առավել ռիսկային գոտիներում առավել խիստ հսկողություն կսահմանվի:
Փաշինյանը կոչ արեց շարունակել պահպանել այն բոլոր հորդորները, որոնք տարածվել են կառավարության, Առողջապահության նախարարության կողմից:
Հայաստանում կորոնավիրուսի հաստատված դեպքերի թիվը հասել է 30-ի: Հայաստանում կորոնավիրուսի հաստատված առաջին դեպքը գրանցվել էր մարտի 1-ին: Քաղաքացին Հայաստան էր եկել Իրանից: Նա արդեն ապաքինվել է և դուրս է գրվել: