2 րոպեի ընթերցում
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Հայաստանի Հանրապետության առողջապահության նախարար Արսեն Թորոսյանն անդրադարձել է Հայաստանում մարտի 11-ին հաստատված կորոնավիրուսի երեք դեպքին: «Արմենպրես»-ի փոխանցմամբ՝ ՀՀ առողջապահության նախարարը կառավարության նիստի ընթացքում նշեց, որ Հայաստանում ընդհանուր առմամբ հաստատվել է կորոնավիրուսով վարակման չորս դեպք:
«Երեկ արձանագրվել է ևս երեք դեպք, և փաստացի այսօր ունենք նոր կորոնավիրուսով վարակի հաստատված չորս դեպք։ Պացիենտներից երեքն այս պահին սիմպտոմներ չունեն, չնայած դիմելու պահին ունեցել են ջերմություն, և միայն մեկն այս պահին ունի գանգատներ, թոքաբորբ, ջերմում է, ստանում բուժում։ Մնացած պացիենտները բուժում չեն ստանում։ Վերջին երեք պացիենտները Հայաստան են ժամանել Իտալիայից, ժամանման պահին որևէ գանգատ չեն ունեցել, սակայն գտնվել են մեր մասնագետների հսկողության տակ»,- ասաց Արսեն Թորոսյանը։
Նրա խոսքով՝ կանխարգելիչ աշխատանքներ են տարվում այդ անձանց հետ շփվողների շրջանակը պարզելու և նրանց մեկուսացնելու ուղղությամբ։ Արդեն տասը անձ մեկուսացվել է հատուկ պահման վայրում, որտեղ ևս 31 անձ կար։ «Ինչպես նաև իրականացվել են մեկուսացման աշխատանքներ իրենց բնակավայրերում՝ բավական մեծ թվով անձանց, հնարավոր է նրանց թվում նորից տեղի ունենա մեկուսացում հատուկ պահման վայրում օրվա ընթացքում»,- նշեց նախարարը՝ ավելացնելով, որ օդանավակայանում կանխարգելիչ աշխատանքները շարունակվում են։
Տիգրան Ավինյանն ասաց, որ կիրակի օրը մեկ չարթերային թռիչք կլինի Հռոմից դեպի Հայաստան, իսկ կառավարության նիստի փակ հատվածում կքննարկեն հետագա քայլերը՝ կապված այդ թռիչքի հետ։