ՀՀ-ի և Վրաստանի պաշտպանության նախարարները քննարկել են երկկողմ համագործակցությանն առնչվող հարցեր
2 րոպեի ընթերցում
ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության պաշտպանության նախարար Դավիթ Տոնոյանը և Վրաստանի պաշտպանության նախարար Իրակլի Ղարիբաշվիլին քննարկել են երկկողմ համագործակցությանն առնչվող մի շարք հարցեր: «Արմենպրես»-ի փոխանցմամբ` այս մասին նախարարների համատեղ հայտարարության ընթացքում ասաց Դավիթ Տոնոյանը:
«Հանդիպման ժամանակ քննարկեցինք Հայաստանի և Վրաստանի միջև հարաբերություններին, միջազգային և տարածաշրջանային անվտանգությանը, ինչպես նաև երկու երկրների միջև պաշտպանության բնագավառում երկկողմ համագործակցությանը վերաբերող հարցեր»,- ասաց Տոնոյանը:
Դավիթ Տոնոյանը շնորհակալություն հայտնեց Վրաստանի նախարարին` Հարավ-Կովկասյան տարածաշրջանում առաջին պաշտոնական այցը Հայաստանի Հանրապետություն կատարելու համար:
«Ցանկանում եմ հավաստիացնել, որ Հայաստանի Հանրապետությունը և Վրաստանը փոխադարձաբար ընկալում և հարգում են միմյանց ժողովրդավարության և արժեքային համակարգերը, նախապատվություններն ու ազգային անվտանգության ապահովմանն ուղղված լուծումները և ձգտում ու իրենց ուրույն ներդրումն են ունենում ապագայում ավելի անվտանգ և բարեկեցիկ Հարավային Կովկաս ունենալու գաղափարին»,- նշեց նախարարը:
Վրաստանի պաշտպանության նախարար Իրակլի Ղարիբաշվիլին Հայաստան է ժամանել երկօրյա պաշտոնական այցով: